india-day-parade-2025-nyc-: 'शिवछत्रपतीं' ची न्यूयॉर्कमध्ये भव्य मिरवणूक; छत्रपती फाउंडेशन तर्फे दिमाखदार आयोजन

भारतीय अलंकार न्यूज 24

नीलिमा शिंगणे जगड 

अकोला: भारतीय स्वातंत्र्यदिनाच्या निमित्ताने दरवर्षी न्यूयॉर्क शहरात भव्य "इंडिया डे परेड" चे आयोजन केले जाते. यावर्षीच्या परेडमध्ये महाराष्ट्राची ओळख असलेल्या छत्रपती शिवाजी महाराजांचा कीर्तीरथ छत्रपती फाऊंडेशन तर्फे सादर करण्यात आला. हा कीर्तीरथ केवळ दिमाखदार सजावट, पोशाख आणि ढोलताशांनीच नव्हे, तर महाराजांच्या ऐतिहासिक क्षणांचे प्रभावी पुनःसादरीकरण यामुळेही विशेष ठरला.

ठळक मुद्दे 

इंडिया डे परेड २०२५ : न्यूयॉर्कमध्ये १७ ऑगस्ट रोजी आयोजन.

छत्रपती फाऊंडेशनचा कीर्तीरथ : महाराज, जिजाऊ, बालशिवबा व मावळ्यांच्या भूमिकांमुळे प्रेक्षक मंत्रमुग्ध.

विशेष अतिथी : मिशिगन राज्याचे खासदार श्री श्री ठाणेदार यांची कीर्तीरथावर उपस्थिती.

परेड ग्रँड मार्शल : सुप्रसिद्ध अभिनेत्री रश्मीका मंदाना व अभिनेता विजय देवरकोंडा.

न्यूयॉर्कचे महापौर एरिक आडम्स यांनी परेडचे उद्घाटन केले.

भारतीय राजदूत बिनया प्रधान यांनी फाउंडेशनच्या कार्याचे विशेष कौतुक.

ढोल-ताशांचा जल्लोष : ५० हून अधिक वादकांच्या गजराने न्यूयॉर्क दुमदुमले.

लेझीम व नृत्याविष्कार : संदेश रेड्डी यांच्या रुद्र डान्स अकॅडमीच्या मुला मुलींनी खास सांस्कृतिक सादरीकरण.

हजारो भारतीय-अमेरिकन नागरिक : मॅडिसन अव्हेन्यू भगवामय, जल्लोषात सामील.

आंतरराष्ट्रीय मान्यता : New York Parade Life वृत्तपत्राने कीर्तीरथाला "Best Float" म्हणून गौरवले.

संस्थेचे सातत्यपूर्ण उपक्रम : गेल्या १५ वर्षांत शिवजयंती, जिजाऊ जयंती, अहिल्यादेवी जयंती, आंबेडकर जयंतीसह अनेक सांस्कृतिक कार्य.

परेडचे आकर्षण – कीर्तीरथ

छत्रपती फाउंडेशनच्या सदस्यांनी सजविलेला कीर्तीरथ हा या परेडचा केंद्रबिंदू ठरला. रथावर शिवाजी महाराज, जिजाऊ, बालशिवबा आणि मावळे यांच्या भूमिका स्थानिक युवक, महिला व बालकांनी साकारल्या. आकर्षक पोशाख, ऐतिहासिक संवाद आणि प्रभावी अभिनयामुळे मॅडिसन अव्हेन्यूवर छत्रपतींचा इतिहास जिवंत झाला.

कीर्तीरथासोबत वाजणारे ढोल-ताशे आणि लेझीम सादरीकरणामुळे वातावरणात एक आगळावेगळा उत्साह पसरला. १०० हून अधिक स्वयंसेवकांनी महाराष्ट्राच्या इतिहास, संस्कृती व लोककलेचा भव्य आविष्कार सादर करून सातासमुद्रापार महाराष्ट्राचे वैभव अमेरिकेच्या भूमीवर नेले.

मान्यवरांची उपस्थिती

मिशिगन राज्याचे खासदार श्री श्री ठाणेदार पूर्णवेळ रथावर उपस्थित राहून नागरिकांचे अभिवादन करत होते. त्यांनी परेड स्टेजवरून संपूर्ण परेडचे निरीक्षण करून फाउंडेशनच्या कार्याचे कौतुक केले.

न्यूयॉर्कचे महापौर एरिक आडम्स यांनी परेडचे उद्घाटन करताना भारतीय समुदायाला शुभेच्छा दिल्या. तर भारताचे न्यूयॉर्कस्थित राजदूत श्री बिनया प्रधान यांनी “छत्रपती फाउंडेशनचा रथ दिमाखदार असतोच, परंतु त्यांचे कार्य त्याहूनही जास्त दिमाखदार आहे” असे गौरवोद्गार काढले.

आंतरराष्ट्रीय गौरव

New York Parade Life वृत्तपत्राने छत्रपतींच्या कीर्तीरथाला "Best Float" म्हणून गौरवले. विशेष म्हणजे, त्यांनी शिवराज्याचा संदर्भ अमेरिकेच्या लोकशाहीच्या मुळांशी जोडून महाराष्ट्राच्या वारशाला जागतिक ओळख दिली.

छत्रपती फाउंडेशनचा सातत्यपूर्ण प्रवास

गेल्या १५ वर्षांपासून न्यूयॉर्कस्थित छत्रपती फाउंडेशन सांस्कृतिक व सामाजिक उपक्रमांद्वारे भारतीय संस्कृती जिवंत ठेवण्याचे काम करत आहे. शिवजयंती, जिजाऊ जयंती, अहिल्यादेवी होळकर जयंती, डॉ. बाबासाहेब आंबेडकर जयंती अशा विविध कार्यक्रमांद्वारे भारतीय वारसा अमेरिकेत पोहचवला जातो. यावर्षी फाउंडेशनने न्यूयॉर्कस्थित भारतीय दूतावासात शिवजयंतीचे आयोजन करून विशेष लक्ष वेधले होते, अशी माहिती 'भारतीय अलंकार न्यूज 24' ला 'छत्रपती फाऊंडेशन, न्यूयॉर्क' च्या पदाधिकाऱ्यांनी दिली.

क्षणचित्रे 

छत्रपती फाउंडेशनचा कीर्तीरथ  शिवाजी महाराज, जिजाऊ, बालशिवबा व मावळ्यांची भव्य झलक.

ढोल-ताशांचा जल्लोष  ५० हून अधिक वादकांच्या गजराने न्यूयॉर्क दुमदुमले.

लेझीम सादरीकरण  रुद्र डान्स अकॅडमीच्या मुलींनी सादर केलेला अनोखा सांस्कृतिक कार्यक्रम.

जनसमुदायाचा उत्साह  मॅडिसन अव्हेन्यू भगवामय करत हजारो लोकांचा सहभाग.

मान्यवरांची उपस्थिती  खासदार श्री श्री ठाणेदार, महापौर एरिक आडम्स व राजदूत बिनया प्रधान यांचे अभिवादन.