भारतीय अलंकार न्यूज 24
नीलिमा शिंगणे जगड
अकोला: लाडक्या बाप्पाच्या आगमनाने संपूर्ण अकोला शहर भक्तीरसात न्हाऊन निघाले आहे. गणेश चतुर्थीच्या मुहूर्तावर सोमवारी विघ्नहर्त्या श्री गणरायाचे मोठ्या आनंदात, उत्साहात आणि जल्लोषात आगमन झाले. ढोल-ताशांचा गजर, गुलालाची उधळण आणि ‘गणपती बाप्पा मोरया’च्या जयघोषात सार्वजनिक मंडळांसह घरोघरी बाप्पाची विधिवत प्राणप्रतिष्ठापना करण्यात आली.
बाजारपेठेत खरेदीचा महापूर सकाळपासूनच शहरातील मुख्य बाजारपेठेसह प्रमुख चौकांमध्ये भाविकांची अलोट गर्दी उसळली होती.
प्रमुख खरेदी केंद्रे:
कुंभारवाडा, जयहिंद चौक, अकोला क्रिकेट क्लब मैदान, जैन मंदिर परिसर, जठारपेठ चौक, सिंधी कॅम्प, कौलखेड चौक, गोरक्षण रोड, डाबकी रोड, वाशीम बायपास चौक, अशोक वाटिका मार्ग, दगडी पूल आणि नेहरू चौक.
साहित्य खरेदी:
गणेशमूर्ती, आरास आणि मखर, फुलांचे हार तसेच पूजा आणि सजावट साहित्य खरेदीसाठी लहान-मोठ्या गणेश मंडळांचे कार्यकर्ते व नागरिकांनी मोठी गर्दी केली होती.
वरुणराजाची रिमझिम हजेरी अन् कार्यकर्त्यांची तारांबळ
गेल्या दीड-दोन महिन्यांपासून दडी मारलेल्या पावसाने गणेश चतुर्थीच्या पूर्वसंध्येला शहरात दमदार हजेरी लावली. सोमवारीही दिवसभर ढगाळ वातावरण होते आणि अधूनमधून रिमझिम पाऊस सुरू होता. वरुणराजाने बाप्पाचे स्वागत केले असले, तरी भर पावसात बाप्पाच्या मूर्ती सुरक्षित मंडपात आणि घरी पोहोचवताना कार्यकर्त्यांची व भाविकांची थोडी तारांबळ उडाली.
घरोघरी नैवेद्य आणि भक्तीमय वातावरण
घरोघरी आकर्षक सजावट आणि रोषणाई करून बाप्पाची स्थापना करण्यात आली. गणरायाचे आवडते मोदक, लाडू आणि पंचपक्वान्नांचा नैवेद्य दाखवण्यात आला. दुपारच्या वेळेत विधिवत पूजन, मंत्रोच्चार आणि सुश्राव्य आरत्यांनी घराघरांमधील वातावरण मंगलमय झाले होते.
महानगरपालिकेची ‘एक खिडकी योजना’: ३१५ मंडळांना मंजुरी गणेशोत्सवात मंडळांना वेगवेगळ्या परवानग्या मिळवणे सुलभ व्हावे यासाठी अकोला महानगरपालिकेने यंदा ‘एक खिडकी योजना’ राबवली. या सुविधेचा लाभ घेत शहरातील तब्बल ३१५ सार्वजनिक गणेशोत्सव मंडळांना सर्व विभागांच्या परवानग्या एकाच छताखाली देण्यात आल्या.
१२ दिवसांचा उत्सव; धार्मिक व सांस्कृतिक मेजवानी यंदा हा गणेशोत्सव १२ दिवस साजरा होणार असून, या काळात सार्वजनिक गणेशोत्सव मंडळांतर्फे व्याख्याने, रक्तदान शिबिरे, भजन-कीर्तन आणि विविध सांस्कृतिक कार्यक्रमांचे नियोजन करण्यात आले आहे.
शहरात चोख पोलीस बंदोबस्त उत्सवादरम्यान शहरात शांतता, सुव्यवस्था व सलोखा अबाधित राखण्यासाठी अकोला पोलीस प्रशासनातर्फे संवेदनशील भाग, मुख्य विसर्जन मार्ग आणि गर्दीच्या ठिकाणी तगडा पोलीस बंदोबस्त तैनात करण्यात आला आहे. सर्वत्र पोलिसांची गस्त सुरू असून सीसीटीव्हीच्या माध्यमातूनही शहरावर करडी नजर ठेवली जात आहे.
टिप्पण्या
टिप्पणी पोस्ट करा