crime-news-akola-gold-theft-: शेजाऱ्यानेच फोडले घर! बनावट चावीने ५ लाखांची चोरी; एलसीबी अकोलाची काही तासांत मोठी कारवाई

रोजी




ठळक मुद्दा

बनावट चावी तयार करून शेजाऱ्याच्या घरातून ४१.०१० ग्रॅम सोन्याची लगड व १.५० लाखांची रोकड लंपास; आरोपी अटकेत, चोरीचा १०० टक्के मुद्देमाल जप्त



भारतीय अलंकार न्यूज 24

नीलिमा शिंगणे जगड 

अकोला | अकोला शहरातील खदान पोलीस ठाण्याच्या हद्दीतील एमराल्ड टॉवर येथे घडलेल्या घरफोडीच्या गुन्ह्याचा स्थानिक गुन्हे शाखेने (एलसीबी) अवघ्या काही तासांत छडा लावत शेजारीच राहणाऱ्या आरोपीला अटक केली आहे. आरोपीने बनावट चावीचा वापर करून घरफोडी करत तब्बल ५ लाख रुपयांचा ऐवज लंपास केला होता. पोलिसांनी चोरी गेलेला १०० टक्के मुद्देमाल हस्तगत करण्यात यश मिळवले आहे.

फिर्यादी सुधीर वसंतराव धंद्रेते हे सहकुटुंब बाहेरगावी गेले असताना त्यांच्या बंद घराचा कडी-कोयंडा बनावट चावीने उघडून बेडरूममधील लाकडी कपाटातून सोन्याचे दागिने व रोख रक्कम चोरी करण्यात आली होती. याप्रकरणी खदान पोलीस ठाण्यात अपराध क्र. १३१३/२०२६ अंतर्गत भारतीय न्याय संहिता (BNS) कलम ३०३(२) नुसार गुन्हा दाखल करण्यात आला होता.

पोलीस अधीक्षक अचिंत चांडक (IPS) यांच्या मार्गदर्शनाखाली स्थानिक गुन्हे शाखेने समांतर तपास सुरू केला. गोपनीय माहिती आणि तांत्रिक विश्लेषणाच्या आधारे पोलिसांनी फिर्यादीच्या शेजारी राहणारा विनोद रमेशराव कोहर (वय ५१) याला ताब्यात घेऊन चौकशी केली. चौकशीत आरोपीने गुन्ह्याची कबुली दिली.

तपासात धक्कादायक बाब समोर आली. आरोपीने फिर्यादीच्या घराचे कुलूप काही काळासाठी मिळवून त्याची बाजारातून बनावट चावी तयार करून घेतली होती. फिर्यादी कुटुंब बाहेरगावी गेल्यानंतर त्याच बनावट चावीच्या साहाय्याने घरात प्रवेश करून चोरी केली.

यानंतर आरोपीने चोरीतील सोन्याचे दागिने अकोला येथील एका सराफाकडे विकल्याची माहिती दिली. पोलिसांनी कायदेशीर कारवाई करत ४१.०१० ग्रॅम वजनाची सोन्याची लगड (किंमत सुमारे ३.५० लाख रुपये) तसेच १.५० लाख रुपये रोख असा एकूण ५ लाख रुपयांचा मुद्देमाल जप्त केला.

आरोपी, जप्त मुद्देमाल आणि तपासाशी संबंधित कागदपत्रे पुढील कारवाईसाठी खदान पोलीस ठाण्याच्या ताब्यात देण्यात आली असून पुढील तपास सुरू आहे.


ठळक मुद्दे 

  • शेजाऱ्यानेच बनावट चावीने घरफोडी केली.

  • फिर्यादी बाहेरगावी असताना चोरीचा डाव.

  • अवघ्या काही तासांत एलसीबीने गुन्हा उघडकीस आणला.

  • आरोपी विनोद रमेशराव कोहर अटकेत.

  • ४१.०१० ग्रॅम सोन्याची लगड व १.५० लाखांची रोकड जप्त.

  • चोरीचा १०० टक्के मुद्देमाल हस्तगत.

  • एकूण जप्त ऐवजाची किंमत ५ लाख रुपये.


कारवाई करणारे अधिकारी

ही कारवाई पोलीस अधीक्षक अर्चित चांडक (IPS), अपर पोलीस अधीक्षक बी. चंद्रकांत रेड्डी (IPS) आणि स्थानिक गुन्हे शाखेचे पोलीस निरीक्षक नितीन लेव्हरकर यांच्या मार्गदर्शनाखाली करण्यात आली. या मोहिमेत API निलेश देशमुख, PSI माजीद पठाण तसेच पोहवा फिरोज, उमेश पराये, खुशाल नेमाडे, PC. अभिषेक पाठक, इमरान शेख स्थानिक गुन्हे शाखा (LCB) आदींचा समावेश होता.

News Keywords

अकोला घरफोडी, LCB Akola, खदान पोलीस, बनावट चावी चोरी, Akola Crime News, Gold Theft Akola, Akola Police News, House Break Case Akola



टिप्पण्या

टिप्पणी पोस्ट करा