court-news-pocso-case-akl: अल्पवयीन मुलीशी गैरवर्तन प्रकरणी आरोपीला शिक्षा; न्यायालयाचा महत्त्वपूर्ण निकाल
भारतीय अलंकार न्यूज 24
नीलिमा शिंगणे जगड
अकोला | पातूर तालुक्यातील चिखलगाव येथे १४ वर्षीय अल्पवयीन मुलीशी गैरवर्तन करून तिला धमकावल्याप्रकरणी आरोपी संजय जेठमल खरडे (वय अंदाजे ४२ वर्षे, रा. चिखलगाव, ता. पातूर, जि. अकोला) याला दोषी ठरवत प्रमुख जिल्हा व सत्र न्यायाधीश द. पां. सातवळेकर यांनी १२ ऑगस्ट २०२६ रोजी शिक्षा सुनावली.
घटनेची पार्श्वभूमी
घटनेच्या वेळी पीडित मुलीचे आई-वडील कामानिमित्त परराज्यात गेले होते. मुलगी तिच्या लहान बहिणीसोबत घरी राहत होती. २३ फेब्रुवारी २०२५ रोजी ती घराच्या अंगणात कपडे धुत असताना आरोपी तेथे आला.
आरोपीने मुलीशी असभ्य संभाषण करण्याचा प्रयत्न केला. मुलीने त्यास विरोध करत अशा प्रकारच्या गोष्टी आपल्याला आवडत नसल्याचे सांगून तेथून निघून जाण्यास सांगितले. मात्र, आरोपीने तिचा हात धरून तिला घरात ओढून नेण्याचा प्रयत्न केल्याचे फिर्यादीत नमूद आहे.
मुलीने प्रसंगावधान राखत आरोपीच्या हातातून स्वतःची सुटका करून घेतली. त्यानंतर आरोपीने ही घटना कोणाला सांगितल्यास जीवे मारण्याची धमकी दिल्याचे प्रकरणात नमूद करण्यात आले आहे.
घाबरलेल्या मुलीने शेजारी राहणाऱ्या मावशीच्या घरी जाऊन घडलेला प्रकार सांगितला. मावशीने तिच्या आईला माहिती दिल्यानंतर आई चिखलगाव येथे आली. त्यानंतर मुलीसोबत पातूर पोलीस ठाण्यात जाऊन आरोपीविरुद्ध तक्रार दाखल करण्यात आली.
न्यायालयात सहा साक्षीदारांची साक्ष
फिर्यादीवरून पातूर पोलिसांनी आरोपीविरुद्ध गुन्हा दाखल करून तपास पूर्ण केल्यानंतर न्यायालयात दोषारोपपत्र सादर केले.
या प्रकरणात सरकार पक्षाने गुन्हा सिद्ध करण्यासाठी एकूण सहा साक्षीदार तपासले. साक्षीदारांचे पुरावे ग्राह्य धरून न्यायालयाने आरोपी संजय जेठमल खरडे याला संबंधित कलमांखाली दोषी ठरविले.
आरोपीला विविध कलमांतर्गत शिक्षा
न्यायालयाने आरोपीला भारतीय न्याय संहितेच्या कलम ७४ अंतर्गत २ वर्षे सश्रम कारावास आणि २,००० रुपये दंड, तसेच दंड न भरल्यास २ महिने अतिरिक्त कारावास अशी शिक्षा सुनावली.
तसेच भारतीय न्याय संहितेच्या कलम ७५ अंतर्गत १ वर्ष सश्रम कारावास आणि १,००० रुपये दंड, दंड न भरल्यास १ महिना अतिरिक्त कारावास अशी शिक्षा ठोठावण्यात आली.
याशिवाय पोक्सो कायद्याच्या कलम १२ अंतर्गत १ वर्ष कारावास आणि १,००० रुपये दंड, दंड न भरल्यास १ महिना अतिरिक्त कारावास अशी शिक्षा सुनावण्यात आली आहे.
न्यायालयाने दंडाची रक्कम पीडितेला देण्यात यावी, असेही आदेशित केले आहे.
ठळक मुद्दे
-
- आरोपी संजय जेठमल खरडे याला न्यायालयाने दोषी ठरविले
- भारतीय न्याय संहितेच्या कलम ७४ व ७५ अंतर्गत शिक्षा
- पोक्सो कायद्याच्या कलम १२ अंतर्गतही दोष सिद्ध
- सरकार पक्षाकडून ६ साक्षीदार तपासण्यात आले
- दंडाची रक्कम पीडितेला देण्याचे न्यायालयाचे आदेश
सरकार पक्षाची बाजू
या प्रकरणात अतिरिक्त सरकारी वकील शाम खोटरे यांनी सरकार पक्षाची बाजू प्रभावीपणे मांडली. तसेच पैरवी अधिकारी ए.एस.आय. अनवार खान, उकंडा जाधव आणि हे.कॉ. म्हात्रे, पोलीस स्टेशन पातूर यांनी प्रकरणाच्या कार्यवाहीत सहकार्य केले.
टिप्पण्या
टिप्पणी पोस्ट करा