land-records-crime-news-akola :भूमिअभिलेख कार्यालयातील तत्कालीन उपअधीक्षक पंकज पवार यांच्यावर फौजदारी गुन्हा दाखल

सरकारी पदाचा गैरवापर केल्याचा आरोप; सिटी कोतवाली पोलिसांत गुन्हा नोंद

ठळक मुद्दे

• भूमिअभिलेख कार्यालयातील तत्कालीन उपअधीक्षक पंकज पवार यांच्याविरुद्ध फौजदारी गुन्हा दाखल

• पदाचा गैरवापर करून शासकीय कामकाजात अनियमितता केल्याचा आरोप

• तब्बल १५ प्रकरणांमध्ये गैरप्रकार केल्याचा आरोप नमूद

• महाराष्ट्र जमीन महसूल अधिनियमासह विविध कलमांखाली गुन्हा नोंद

• सिटी कोतवाली पोलिसांकडून पुढील तपास सुरू

भारतीय अलंकार न्यूज 24

नीलिमा शिंगणे जगड 

अकोला : जिल्हा अधीक्षक भूमिअभिलेख कार्यालय, अकोला येथे तत्कालीन उपअधीक्षक म्हणून कार्यरत असलेले श्री. पंकज पवार (सध्या निलंबित) यांच्याविरुद्ध सिटी कोतवाली पोलिस ठाण्यात फौजदारी गुन्हा दाखल करण्यात आला आहे. शासकीय पदावर कार्यरत असताना अधिकारांचा गैरवापर करून विविध प्रकारचे गैरप्रकार केल्याचा आरोप त्यांच्यावर ठेवण्यात आला आहे.

माहितीनुसार, पंकज पवार यांनी दिनांक १ जून २०२३ ते ३० ऑगस्ट २०२५ या कालावधीत पदावर असताना शासनाने सोपविलेल्या जबाबदाऱ्यांचा गैरवापर केल्याचे तपासात समोर आले आहे. त्यांनी पदाचा वापर करून १५ प्रकरणांमध्ये स्वाधिकारातील मिळकतींचे स्वरूप बदलणे, मृत खातेदारांच्या नावाने अर्ज स्वीकारणे, अस्थायी भाडे तत्त्वावरील मिळकत पत्रिका तयार करणे, सार्वजनिक सुविधांसाठी असलेल्या जमिनी खासगी व्यक्तींच्या नावावर करण्याचा प्रयत्न करणे तसेच अधिकार क्षेत्राबाहेर जाऊन प्रमाणपत्रे देणे अशा विविध अनियमितता केल्याचा आरोप आहे.

या प्रकारामुळे शासनाचा विश्वासघात झाला असून शासनाची फसवणूक झाल्याचे नमूद करण्यात आले आहे. याबाबत जिल्हा अधीक्षक भूमिअभिलेख कार्यालयाकडून सिटी कोतवाली पोलिस ठाण्यात लेखी तक्रार दाखल करण्यात आली होती.

तक्रारीच्या आधारे सिटी कोतवाली पोलिसांनी गुन्हा क्रमांक २९८/२०२६ अंतर्गत भारतीय न्याय संहिता कलम १९९, २०७, ३१६(२), ३१६(५), ३१८(३) तसेच महाराष्ट्र जमीन महसूल अधिनियम १९६६ मधील कलम १०६ व १३५ अन्वये दिनांक २ जून २०२६ रोजी गुन्हा दाखल केला आहे.

सदर प्रकरणाचा तपास वरिष्ठ पोलिस अधिकाऱ्यांच्या मार्गदर्शनाखाली सुरू असून, पुढील तपास पोलीस उपनिरीक्षक अजित इंगोले करीत आहेत. या कारवाईमुळे शासकीय यंत्रणांमधील गैरप्रकारांवर लगाम बसण्याची अपेक्षा व्यक्त केली जात आहे.