asian-championship-boxing-ak : अकोल्याचा ‘पंच’ ताश्कंद मध्ये ! गोपाल गणेशेची भारतीय बॉक्सिंग संघात निवड

उझबेकिस्तानातील एशियन बॉक्सिंग स्पर्धेत भारतासाठी लढणार दमदार बॉक्सर

भारतीय अलंकार न्यूज 24

नीलिमा शिंगणे जगड 

अकोला : आंतरराष्ट्रीय क्रीडाक्षेत्रात अकोल्याचा झेंडा उंचावणारी अभिमानास्पद बातमी समोर आली आहे. एशियन U-15 & U-17 बॉक्सिंग चॅम्पियनशिप 2026 साठी भारतीय संघ जाहीर झाला असून, अकोला क्रीडा प्रबोधिनीचा जिगरबाज बॉक्सर गोपाल रामेश्वर गणेशे याची राष्ट्रीय संघात निवड झाली आहे.

उझबेकिस्तानमधील ताश्कंद येथे 1 ते 16 मे 2026 दरम्यान होणाऱ्या या प्रतिष्ठेच्या स्पर्धेत गोपाल भारताचे प्रतिनिधित्व करणार आहे. आपल्या आक्रमक खेळशैली, अचूक पंचिंग आणि जिद्दीच्या जोरावर त्याने राष्ट्रीय स्तरावर स्वतःची वेगळी ओळख निर्माण केली आहे.

 ठळक मुद्दे:

• एशियन U-15 & U-17 बॉक्सिंग चॅम्पियनशिपसाठी भारतीय संघ जाहीर

• अकोल्याच्या गोपाल गणेशेची राष्ट्रीय संघात निवड

• स्पर्धा स्थळ – ताश्कंद, उझबेकिस्तान

• कालावधी – 1 मे ते 16 मे 2026

• पटियाला येथे 15 ते 30 एप्रिल दरम्यान विशेष प्रशिक्षण शिबीर

• कोच सतीशचंद्र भट्ट यांच्या मार्गदर्शनाखाली घडलेला खेळाडू

• आक्रमक शैली व अचूक पंचिंगमुळे प्रतिस्पर्ध्यांवर वर्चस्व

गोपालच्या या यशामागे त्याचे मार्गदर्शक व आंतरराष्ट्रीय कोच  सतीशचंद्र भट्ट यांचे मोठे योगदान आहे. त्यांच्या शिस्तबद्ध प्रशिक्षणामुळे गोपाल आज आंतरराष्ट्रीय स्तरावर देशाचे प्रतिनिधित्व करण्यास सक्षम झाला आहे.

पटियाला येथे पार पडलेल्या विशेष प्रशिक्षण शिबिरात गोपालने उत्कृष्ट कामगिरी करत प्रशिक्षकांचे लक्ष वेधून घेतले. आधुनिक तंत्रज्ञानाच्या सहाय्याने तांत्रिक, शारीरिक आणि मानसिक तयारी केल्यामुळे तो आता स्पर्धेसाठी पूर्णपणे सज्ज आहे.

क्रीडावर्तुळातून असा विश्वास व्यक्त होत आहे की, गोपाल केवळ सहभागासाठी नाही, तर पदक जिंकण्यासाठीच रिंगमध्ये उतरणार आहे. त्याच्या प्रत्येक पंचमध्ये आता भारताची ताकद दिसणार आहे.

अभिनंदनाचा वर्षाव

या यशाबद्दल अकोला जिल्हाधिकारी वर्षा मीना , जिल्हा क्रीडा अधिकारी सतीशचंद्र भट, क्रीडा सहाय्यक संचालक सुधीर मोरे, उपसंचालक अमरावती विभाग शेखर पाटील, क्रीडा आयुक्त शीतल तेली उगले, क्रीडापीठ उपसंचालक माणिक पाटील,सर्व क्रीडाप्रेमी आणि स्थानिक नागरिकांनी खेळाडूंचे अभिनंदन करत पुढील वाटचालीस शुभेच्छा दिल्या आहेत.

इतिहास घडवण्यासाठी सज्ज

ताश्कंदच्या रिंगमध्ये अकोल्याचा हा खेळाडू घणाघाती कामगिरी करत भारताचा तिरंगा अभिमानाने फडकवेल, अशी सर्वांना अपेक्षा आहे. महाराष्ट्राचा हा ‘पंच’ आता आशियाई स्तरावर इतिहास घडवण्यासाठी सज्ज झाला आहे.