akola-crime-kaulkhed-case-: कौलखेड मारहाण प्रकरण : 8 तासांत पोलिसांची धडक कारवाई, सर्व आरोपी जेरबंद

बार्शीटाकळी जंगलात लपलेले आरोपी पकडले; गुन्ह्यातील 3 मोटारसायकली जप्त

ठळक मुद्दा 

खडकी व कौलखेड परिसरातील सलग तीन गंभीर मारहाणीच्या घटनांनंतर पोलिसांची वेगवान कारवाई; तांत्रिक विश्लेषण व गुप्त माहितीच्या आधारे आरोपींचा माग काढला.

भारतीय अलंकार न्यूज 24

नीलिमा शिंगणे जगड 

अकोला: शहरातील कौलखेड व खडकी परिसरात ४ एप्रिल २०२६ रोजी घडलेल्या मारहाण व जीवघेणा हल्ल्याच्या तीन गंभीर घटनांमध्ये पोलिसांनी अवघ्या ८ तासांत सर्व आरोपींना अटक करत मोठे यश मिळवले आहे.

पोलीस स्टेशन खदान येथे गुन्हा क्रमांक ८५५/२०२६, ८५६/२०२६ व ८५७/२०२६ अंतर्गत भारतीय न्याय संहिता (BNS) मधील विविध कलमांनुसार गुन्हे दाखल करण्यात आले होते.

घटनेची गंभीरता लक्षात घेऊन SDPO पथक, खदान पोलीस व स्थानिक गुन्हे शाखा (LCB) यांची संयुक्त टीम तयार करण्यात आली. आरोपी अटक टाळण्यासाठी बार्शीटाकळी तालुक्यातील खडकी शेतशिवार जंगल परिसरात लपून बसले होते, मात्र पोलिसांनी तांत्रिक विश्लेषण व गुप्त माहितीच्या आधारे त्यांचा अचूक ठावठिकाणा शोधून काढला.

५ एप्रिल २०२६ रोजी पहाटेच्या सुमारास पोलिसांनी छापा टाकून सर्व आरोपींना ताब्यात घेतले. यावेळी त्यांच्या ताब्यातील ३ मोटारसायकली जप्त करण्यात आल्या.

अटक आरोपी

• कबीर सुनील बलखंडे (१८, न्यू खेतान नगर)

• धनंजय संदीप ढाले (१९, TTM कॉलेज परिसर)

• शिवम उर्फ शुभम संजय शेळके (१९, हिंगणा नाका)

• गौरव सुनील चव्हाण (२०, खडकी, ता. बार्शीटाकळी)

• एक विधी संघर्षग्रस्त बालक

प्राथमिक चौकशीत काय समोर आले?

चौकशीत आरोपींनी जुन्या आपसी वादातून मारहाण केल्याची कबुली दिली आहे. काही आरोपींवर यापूर्वीही गुन्हे दाखल असल्याची माहिती समोर आली आहे.

अल्पवयीन आरोपीवरही कडक कारवाई

या प्रकरणातील अल्पवयीन आरोपीवर JJ ॲक्टनुसार प्रौढ म्हणून खटला चालवण्याची मागणी न्यायालयात करण्यात येणार आहे. संबंधित बालकांच्या पालकांनाही चौकशीसाठी बोलावले जाणार आहे.

पोलिसांचे मार्गदर्शन व पथक

ही कारवाई पोलीस अधीक्षक अर्चित चांडक, अपर पोलीस अधीक्षक बी. चंद्रकांत रेड्डी, SDPO सुदर्शन पाटील व पोलीस निरीक्षक शंकर शेळके यांच्या मार्गदर्शनाखाली करण्यात आली.

API विजय चव्हाण, PSI गोपाल जाधव, PSI विष्णू बोडखे, PSI माजिद पठाण यांच्यासह स्थानिक गुन्हे शाखेच्या पथकाने ही धडक कारवाई यशस्वी केली.

ठळक मुद्दे

• ३ गंभीर मारहाण व जीवघेणा हल्ल्याचे गुन्हे नोंद

• अवघ्या ८ तासांत सर्व आरोपी अटकेत

• बार्शीटाकळी जंगलातून आरोपींना पकडले

• ३ मोटारसायकली जप्त

• जुन्या वादातून गुन्हा केल्याची कबुली

• अल्पवयीन आरोपीवरही प्रौढ म्हणून खटला चालवण्याची तयारी