भारतीय अलंकार न्यूज 24
नीलिमा शिंगणे जगड
अकोला : जिल्ह्यात गुरुवारी १९ मार्च सायंकाळी अचानक झालेल्या अवकाळी पावसासह गारपिटीने जनजीवन विस्कळीत झाले. सुमारे सायंकाळी ५ वाजताच्या सुमारास अकोला व अकोट तालुक्यासह ग्रामीण भागात वादळी वाऱ्यासह मुसळधार पाऊस आणि गारपीट झाली. या अनपेक्षित बदलामुळे शेतकऱ्यांच्या चिंतेत मोठी भर पडली असून काढणीला आलेल्या पिकांना मोठा फटका बसण्याची शक्यता व्यक्त केली जात आहे.
सायंकाळी ग्रामीण भागात पाऊस झाल्यानंतर रात्री सुमारे ११ वाजल्यानंतर अकोला शहरातही वादळी वाऱ्यासह पावसाने जोरदार हजेरी लावली. आकाशातील गडगडाट आणि वाऱ्याच्या वेगामुळे शहरातील अनेक भागात वीजपुरवठा खंडित झाला. परिणामी अर्ध्याहून अधिक शहर अंधारात बुडाले होते.
तसेच पातूर येथेही वीजपुरवठा खंडित झाल्याची माहिती समोर आली आहे.
अकोट तालुक्यातील सावरा, पणज, देऊळगाव, रंभापूर, कालवाडी तसेच परिसरातील अनेक गावांमध्ये पावसासोबत जोरदार गारपीट झाली. काही ठिकाणी गारांचा एवढा मोठा वर्षाव झाला की शेतांमध्ये गारांचा खच साचल्याचे चित्र पाहायला मिळाले.
दर्यापूर आणि अंजनगाव मार्गावरील शेतांमध्ये गारांचे प्रमाण अधिक असल्याचे स्थानिक नागरिकांनी सांगितले.
या गारपीटीमुळे काढणीस आलेल्या अनेक पिकांना मोठे नुकसान होण्याची शक्यता आहे.
विशेषतः कांदा, गहू, हरभरा आणि संत्रा या पिकांना मोठा फटका बसल्याचे प्राथमिक अंदाज आहेत.
गहू आणि हरभरा पिके अंतिम टप्प्यात होती.
पावसामुळे उत्पादन घटण्याची शक्यता.
संत्रा बागांमध्ये फळगळ वाढण्याची भीती.
शेतकऱ्यांना आर्थिक फटका बसण्याची शक्यता.
सुमारे एक तास सुरू असलेल्या वादळी वाऱ्यासह पावसामुळे शहरातील अनेक रस्त्यांवर पाणी साचले. काही ठिकाणी झाडांच्या फांद्या तुटल्याच्या घटनाही घडल्या.
खारपान पट्ट्यातील काही गावांमध्येही गारपीट झाल्याची माहिती समोर येत आहे.
अचानक आलेल्या या अवकाळी पावसामुळे शेतकऱ्यांच्या हाती आलेले पीक धोक्यात आले आहे. त्यामुळे प्रशासनाने तातडीने पंचनामा करून नुकसान भरपाई द्यावी, अशी मागणी शेतकरी वर्गाकडून केली जात आहे.
अकोला व अकोट तालुक्यात अवकाळी पाऊस आणि गारपीट
अनेक गावांमध्ये शेतांमध्ये गारांचा खच साचला
कांदा, गहू, हरभरा आणि संत्रा पिकांना मोठा फटका
अकोला शहरात वादळी वाऱ्यासह रात्री पाऊस
अर्ध्याहून अधिक शहर काही काळ अंधारात
प्रशासनाकडे पंचनामा व नुकसान भरपाईची मागणी
टिप्पण्या
टिप्पणी पोस्ट करा