ladaki-bahin-akola-malkapurp: अकोल्यातील लाडक्या बहिणी विरुद्ध मलकापूरात तक्रार दाखल ; राज्यातून पहिली तक्रार थेट पोलीस स्टेशनला

File image 

भारतीय अलंकार न्यूज 24

नीलिमा शिंगणे जगड 

अकोला: कौलखेड अकोला येथील एका लाडक्या बहिणी विरुद्ध मलकापूर शहर ( बुलढाणा) पोलीस स्टेशनला महाराष्ट्रातून पहिली तक्रार दाखल झाली  आहे. या योजनेचा लाभ घेणाऱ्या अपात्र महिलांची तक्रार आल्यास त्यावर कारवाई होणार असल्याचं महिला व बालविकास राज्य मंत्री आदिती तटकरे यांनी नुकतच म्हंटले होते.  ही पहिलीच तक्रार लाडक्या बहिणी विरुध्द थेट पोलीस स्टेशनला दाखल झाली आहे. त्यामुळे यावर काय कारवाई होते, याकडे अवघ्या महाराष्ट्राचे लक्ष लागले आहे.

महाराष्ट्र शासनाने मुख्यमंत्री माझी लाडकी बहिण योजना जाहिर केली आहे. मात्र अपात्र महिलांनीही या योजनेचा लाभ घेतल्याचे आता समोर येत आहे. अर्जदार महिला हिने पहिले 30 ऑगस्ट 2024 रोजी योजनेचा अर्ज केला होता . त्यानतंर 02 सप्टेंबर 2024 रोजी त्यांचा शासनाद्वारे अर्ज मंजुर करण्यात आला. त्याप्रमाणे प्रस्तुत अर्जदार हिस दरमहा 1500 रूपये प्रमाणे निधी तिचे खात्यात प्राप्त झाला आहे. खरे तर अर्जदार हिने खोटे व बनावटी हमीपत्राचा दस्त तयार करून त्यात खोटी व बनावटी माहित दिली, व तो खरा आहे असे भासवुन जाणीवपूर्वक सदर दस्त संबंधीत अधिकाऱ्यांकडे सादर केला. त्याद्वारे शासनाची फसवणुक करून स्वतःचा गैरहक्की आर्थिक लाभ प्राप्त केला असल्याचे फिर्यादीने तक्रारीत म्हंटले आहे.

या योजने करीता पात्रता निकष असे आहेत की, ज्या महिलेच्या एकत्रीत कुटुंबाचे वार्षिक उत्पन्न 2,50,000 /- रूपयांपेक्षा अधिक आहे, ज्या कुटूंबातील सदस्य आयकर दाता आहे, ज्या कुटूंबातील व्यक्ती सरकारी कर्मचारी म्हणुन सेवानिवृत्ती नंतर सेवानिवृत्ती वेतन घेतात, ज्यांच्या कुटूंबात चारचाकी वाहन आहे किंवा ज्या कुटूंबातील सदस्यांची संयुक्तपणे पाच एकर पेक्षा जास्त शेतजमिन आहे अशा महिला या योजनेसाठी पात्र ठरत नाही. पात्र अर्जदार लाडक्या बहिणीला तसे हमीपत्र सुद्धा द्यावे लागते. असे निकष असताना अर्जदार लाडकी बहिण  हिने तिचे लग्नानंतरचे नावाने अर्ज केला आहे. सदर अर्जदार हिचे सासर कडील एकत्र कुटूंबाचे उत्पन्न अडीच लाख पेक्षा जास्त आहे, सदर अर्जदार हिचे सासरे सेवानिवृत्ती वेतन घेतात. त्यांचे पतीचे नावाने एकुण 6 एकर शेतजमिन आहे. म्हणजेच निकषाप्रमाणे पाच एकर पेक्षा जास्त शेतजमीन आहे. असे असतांना देखील व सदरची बाब पुर्णतः माहिती व जाणीवेतील असतांना देखील प्रस्तुत अर्जदार हिने खोटे हमीपत्र निष्पादीत केले. सदर हमीपत्र व त्यातील मजकुर खोटा आहे याची माहिती व जाणीव असतांना गैरहक्की आर्थिक लाभाचे दुषित हेतुने त्याचा वापर करून शासनाची फसवणुक केली आहे व स्वतःचा आर्थिक लाभ प्राप्त करून घेतला असल्याचे फिर्यादी यांचे म्हणणे आहे.

प्रस्तुत अर्जदार ही तिचे पतीपासून गेल्या पाच ते सहा वर्षापासुन विभक्त राहत आहे. दरम्यान अकोला येथील न्यायालयात खावटीकरीता न्यायालयीन प्रकरणे सुरू असून, सदर अर्जदार हिस तिचे पतीपासून एकत्रीतरित्या दरमहा 50,000 रूपये म्हणजेच वार्षिक सहा लाख रुपये खावटी मंजुर झाल्याचे देखील तक्रारीत नमूद केले आहे. 

निकषास पात्र नसतांना देखील खोटी माहिती देवून व खरी माहिती लपवून  अर्जदार हिने योजनेचा लाभ मिळविला आहे. अर्जदार हिचे माहेरचे परिवारात चारचाकी वाहन आहे व त्या परिवाराचे उत्पन्न देखील अडीच लाखापेक्षा जास्त आहे. असे असतांना स्वतःचे वैवाहिक स्थितीबाबत खोटी माहिती प्रस्तुत अर्जदाराने दिली असून शासनाची फसवणुक केली आहे व स्वतःचा गैरहक्की फायदा करून घेतला आहे.

सदर महिती जनमाहिती अधिकारी तथा नायब तहसिलदार, मलकापूर यांचेकडून अर्ज व त्यासोबतची कागदपत्र यांची माहिती अधिकार कायद्याअंतर्गत मागणी केली असता. अर्जदार हिने खोटे हमीपत्र तयार करून त्यात खोटी माहिती देऊन शासनाची फसवणुक केल्याबाबतची व स्वतःचा गैरहक्की फायदा करून घेतला असल्याचे दिसले. अर्जदार हिचे हे कृत्य दखलपात्र स्वरूपाचा गुन्हा असून, शासनाची दिशाभूल करून फसवणूक केली आहे. यामुळे या लाडक्या बहिणीवर कारवाई करावी,अशी मागणी फिर्यादीने तक्रारीत केली आहे. अकोल्यातील या लाडक्या बहिणी विरूध्द मलकापूर शहर पोलीस स्टेशनला राजेंद्र काजळे यांनी ही फिर्याद 23 डिसेंबर 2024 रोजी दिली आहे. मात्र अद्यापही संबंधितांकडून दखल घेण्यात आली नसल्याचे फिर्यादीने म्हंटले आहे.