raid-illegal-moneylender-akl: अकोल्यात अवैध सावकारी विरुध्द धाडसत्र; शहरात एकाच वेळी तीन ठिकाणी धाड

भारतीय अलंकार न्यूज 24

नीलिमा शिंगणे जगड 

अकोला: शहरात अवैध सावकारी करीत असल्याबाबत प्राप्त तक्रारीनुसार अकोला शहरात आज तीन ठिकाणी महाराष्ट्र सावकारी (नियमन) अधिनियम 2014 चे कलम 16 मधील तरतुदीनुसार डॉ. प्रविण लोखंडे जिल्हा उपनिबंधक, सहकारी संस्था, अकोला यांचे मार्गदर्शनात डॉ. महेंद्र  चव्हाण, उपनिबंधक, सहकारी संस्था, तालुका अकोला यांनी धाडसत्र राबविले. 

अकोला शहरातील सुधीर कॉलनी, जठारपेठ व कृषी उत्पन्न बाजार समिती परिसर या तीन ठिकाणी तीन पथकाव्दारे शोध मोहीम करण्यात आली. सहकार विभागाचे सहाय्यक निबंधक पथक प्रमुख अभयकुमार कटके, रोहीणी  विटणकर तसेच ज्योती  मलिये यांच्या पथकाव्दारे एकुण 33 कर्मचा- याकडून आज धाड टाकण्यात आली. 

या धाडी दरम्यान मूळ खरेदीखत-2, खरेदीखत छायाप्रत-3, चूक दुरुस्ती लेख छायाप्रत-1, चिठ्ठी-2, रोकडवही-2, उधारी वही-2, भाडे वही-1, बँक पासबुक नोंदवही-1, व्हाऊचर बुक-1, व्हाऊचर स्लीप 1 ते 41, चेक बुक-4, चेक-7, कोरे चेक-47, रद्द केलेले चेक-4, कोरे लेटर हेड-1, कोरे स्टॅम्प 7, प्रतीज्ञालेख-1, 7/12 उतारा-4, आधारकार्ड-3, बँक पासबुक-5, संगणक सीपीयु- जप्त करण्यात आले आहेत. 

यासाठी आवश्यक तो पोलीस बंदोबस्त पोलीस विभाग अकोला यांचेकडून घेण्यात आलेला आहे. धाडीमधील जप्त दस्तऐवजांची पडताळणी तसेच प्राप्त तक्रारीचे अनुषंगाने चौकशी प्रक्रिया पूर्ण झाल्यानंतर पुढील कार्यवाही प्रस्तावित करण्यात येईल.

ही कारवाई अभयकुमार कटके, डि. डब्ल्यू शिरसाट, एस.पी. फुके, डि. डि. गोपनारायण, एम. आर. सोनुलकर, सविता राऊत, ज्योती  मलिये, आर. आर. घोडके, आर. पी. भोयर, एस. ए. गावंडे, आर. एम. बोंद्रे, आर. एस. इंगळे, रोहीणी विटनकर, एस. डि. नरवाडे, एस. एस. आगाशे, एम. के. विखे, विनोद खंदारे, एस. एम. वानखडे आदी सहभागी होते.  

कार्यवाहीमध्ये जिल्हा परिषद, अकोलाचे कर्मचारी, कृषी उत्पन्न बाजार समिती कर्मचारी तसेच जिल्हा मध्यवर्ती सहकारी बँकेचे पंच म्हणून तसेच पोलीस विभागाचे अधिकारी,कर्मचारी यांचा सहभाग होता. 

धाडीमध्ये प्राप्त दस्तऐवज यांची तपासणी करून महाराष्ट्र सावकारी (नियमन) अधिनियम 2014 व अंतर्गत नियम यानुसार पुढील कार्यवाही करण्यात येईल, असे अधिकृत सुत्रांनी सांगितले.

अकोला जिल्हयात सावकारीचा अधिकृत परवाना नसलेल्या व्यक्तींकडून व्याजाने पैसे दिले जात असल्यास अशा व्यक्तीची तक्रार आवश्यक पुराव्यासह आपल्या तालुक्याच्या उपनिबंधक सहाय्यक निबंधक, सहकारी संस्था कार्यालयात अर्ज दाखल करावा. तसेच ज्या नागरीकांना कर्जाची आवश्यकता असेल त्यांनी नोंदणीकृत पतसंस्था, बँका, वित्तीय संस्था किंवा सहकार विभागाकडील परवानाधारक सावकार यांचेकडुन रितसर कर्ज घ्यावे, असे आवाहन जिल्हा उपनिबंधक, सहकारी संस्था, अकोला कार्यालय मार्फत केले आहे.