Wine-liquor-store-Kisan Brigade: दारू दुकानवरील 'वाईन' ही अक्षरे हटवा !वाईनला अबकारी विभागाऐवजी कृषी प्रक्रिया उद्योगात आणा : किसान ब्रिगेडची मागणी

Delete the letter 'Wine' from the liquor store! Bring wine into agro-processing industry instead of excise department: Demand of Kisan Brigade





ॲड.नीलिमा शिंगणे-जगड

अकोला: दारु दुकानावरील वाईन ही अक्षरे हटवून त्याऐवजी 'लिकर शॉप' लिहावे, तसेच वाईनला अबकारी विभागाऐवजी कृषी प्रक्रिया उद्योगात आणावे, अशी मागणी किसान ब्रिगेडचे संस्थापक राष्ट्रीय अध्यक्ष प्रकाश पोहरे यांनी देशाचे प्रधानमंत्री व राज्याचे मुख्यमंत्री यांना डिसेंबर 2019 रोजी पाठविलेल्या निवेदनातून केली होती. मात्र, अद्यापही यावर कुठलीच प्रतिक्रिया सरकारने दिलेली नाही.  यासाठी आता यासंदर्भात व्यापक जनजागृती करून प्रसंगी किसान ब्रिगेडच्या माध्यमातून आंदोलन उभारून दुकानांच्या पाट्यांवरील 'वाईन' या नावावर काळा रंग फासण्यात येईल,अशी चेतावणी प्रकाश पोहरे यांनी दिली.


गुरुवारी या संदर्भात किसान ब्रिगेडने आमंत्रित पत्रकार परिषदेत प्रकाश पोहरे बोलत होते.




खरे तर वाईन हे संपूर्णपणे कृषी उत्पादन आहे. फळाचा केलेला बाटलीबंद उत्कृस्ट रस याशिवाय वाईनची दुसरी व्याख्या करता येत नाही. वाईन हे खरे तर हेल्थ ड्रिंक आहे. मात्र, दारू विकणाऱ्या दुकानांना 'लिकर शॉप' ऐवजी शब्दच्छल करीत 'वाईन शॉप' असे गोंडस नाव दिल्यामुळे  वाईन बद्दल अनेक गैरसमज पसरले असल्याचे प्रकाश पोहरे यावेळी म्हणाले.



'वाईन शॉप' ही शक्कल इंग्रजांची


समाजात दारूला प्रतिष्ठा नसल्याने दारू निषिद्ध आहे. त्यामुळे इंग्रज काळात भारतामध्ये दारूची दुकाने लावण्याकरिता 'वाईन शॉप' ही शक्कल इंग्रजांनी काढली आणि त्या नावाने देशभर दारू दुकाने सुरू झाली, ती स्वतंत्र भारतामध्ये सुध्दा अजूनही अबकारी खात्याअंतर्गतच सुरु आहेत. या वाईन शॉप नाव असलेल्या दुकानांमधून झालेल्या 'वाईन आणि लिकर' यांच्या विक्रीवर एक नजर टाकली तर दिसेल की वाईनची विक्री ही लिकर म्हणजे दारूच्या तुलनेत एक टक्के सुद्धा नाही,ही एकच बाब वस्तुस्थिती स्पष्ट करते,असे  यावेळी पोहरे यांनी सांगितले.




वाईन डिस्ट्रिक्ट


जगात अनेक देशात, एवढेच कशाला कर्नाटक मधील कुडग या जिल्ह्यात घरोघरी सुगरण गृहिणी विविध फळापासून वेगवेगळ्या प्रकारच्या जवळपास १५० प्रकारच्या वाईन बनवतात. ज्यात लाल व हिरवी द्राक्ष, जांभूळ, डाळिंब, पेरु, गाजर, काकडी, मुळा, बीट रूट, शुगर बिट, रताळी, मोसंबी, संत्रा, चिकू, सीताफळ, महुवा, टोमॅटो, सफरचंद, अंगुर, किवी,आंबा, मिरची, स्ट्राबेरी, लीची, फणस, ड्रॅगन फ्रूट, कोकम, चेरी, विविध प्रकारच्या बेरी, अंजीर, उसाचा रस, टरबूज, खरबूज व इतर बहुतांश फळांच्या वाईनचा समावेश होतो. त्यामुळे कुर्गला 'वाईन डिस्ट्रिक्ट' ही ओळख प्राप्त झाली आहे. भारतात गोवा व केरळ वगळता इतरत्र मात्र वाईन शॉपच्या आवरणाखाली लिकर म्हणजे चक्क दारू विकण्याच्या या धोरणामुळे 'वाईन' संदर्भात समाजात अनेक गैरसमज पसरले असल्याचेही पोहरे म्हणाले.



'वाईन' ला 'ऍग्री हेल्थ ड्रिंक' चा दर्जा द्यावा


भारतात वाईन हे पेय अबकारी विभागा अंतर्गत असल्यामुळे त्यावर आधारित प्रक्रिया उद्योगावर 'लायसन्स परमिट' राज अंतर्गत अनेक बंधने आल्यामुळे आणि जबर फी व अबकारी कर आकारणा मुळे या कृषि आधारीत उद्योगाच्या विकासाचा संकोच झाला आहे. आज देशभर विविध फळांचे विपुल उत्पादन होते आहे. मात्र जाचक अटींमुळे आणि गैरसमज असल्यामुळे या फळांवर आधारित उद्योगात शिरण्यास शेतकरी धजावत नाहीत, परिणामी एकीकडे कृषीउत्पादन असलेली फळे वाया जाऊन शेतकरी नुकसानीत येऊन आत्महत्या करीत आहेत. त्यामुळे वाईन संदर्भातील इंग्रज कालीन धोरण बदलून दारू दुकानावरची 'वाईन' ही अक्षरे हटवून त्यावर 'लिकर शॉप' असे लिहिण्याची सक्ती करावी, तसेच 'वाईन' ला कृषी उत्पादनाचा दर्जा व विविध सवलती आणि अनुदाने देऊन वाईन उद्योग हा खादी ग्रामोद्योगा अंतर्गत कुटिरोद्योग म्हणून भरभराटीला आणावा आणि शेतकरी समृद्ध करावा. यासाठी नियमात बदल करून 'वाईन'ला 'ऍग्री हेल्थ ड्रिंक' चा दर्जा देण्यात यावा, अशी किसान ब्रिगेडची मागणी असल्याचे प्रकाश पोहरे  यांनी सांगितले.




वाईनच्या नशिबीच वनवास का ?


एकीकडे प्रकृतीला अत्यंत हानिकारक 'टॉयलेट साफ करण्याच्या लायकीची' अनेक शीतपेये बाजारात खुलेआमपणे प्रतिष्ठेच्या नावाखाली विकल्या जात असतांना शुद्ध कृषी उत्पादन असलेल्या आरोग्यवर्धक वाईनच्या नशिबी मात्र असा वनवास का? असा सवालही प्रकाश यांनी यावेळी उपस्थित केला. तर दुसरीकडे साखरेच्या औद्योगिक मळीपासून तयार केलेली आणि फळांचा दुरुनही संबंध नसलेली आणि आरोग्यास अत्यंत घातक अशी दारू मात्र चक्क 'संत्रा', 'मोसबी' 'नारिंगी या नावाने शासनाच्या आशीर्वादाने खुलेआम विकल्या जात असल्याबद्दल पोहरे यांनी यावेळी आश्चर्य व्यक्त केले.  दरम्यान, हेल्थ ड्रिंक असलेल्या वाईन संदर्भात प्रचलित गैरसमज दूर करण्यासाठी अनेक मान्यवरांचे दाखले तसेच जगातील विविध देशातील परिस्थिती काय आहे, हे आपण तपासून पाहु शकता, असे देखील प्रकाश पोहरे म्हणाले.



शेतकऱ्यांचे व्यापक हीत जोपासणे आवश्यक


शेतकऱ्यांच्या व्यापक हिताकरिता विशेषता फळ उत्पादक शेतकऱ्यांच्या आणि नागरिकांच्या आरोग्याच्या व्यापक हिताकरिता हे करणे अत्यंत आवश्यक आहे. त्यामुळे याकरिता विशेष प्रयत्न करून किंवा अध्यादेश काढून शेतकऱ्यांच्या व्यापक हितासाठी दारू दुकान वरील वाईन ही अक्षरे काढण्याकरिता या पुरोगामी राज्याचे पुरोगामी मुख्यमंत्री या प्रगतिशील देशाचे पंतप्रधान म्हणून पुढाकार घ्यावा, अशी विनंती वजा मागणी राज्य व केंद्र सरकारकडे निवेदनाद्वारे केली असल्याचे देखील प्रकाश पोहरे यांनी सांगितले.




दारू दुकानावरील वाईन हे नाव न हटविल्यास आंदोलन

                 श्री प्रकाश पोहरे


वाईनला कृषी उद्योगाचा दर्जा देण्यासाठी किसान ब्रिगेडच्या माध्यमातून व्यापक जनजागृती केल्या जाणार आहे, त्याअंतर्गत लवकरच अनेक जिल्हयात वाईन क्लब स्थापन करून 'वाईन फेस्टिव्हल' आयोजित केल्या जाणार आहेत. नागपूर येथे शरद फडणवीस यांच्या मार्गदर्शनात नागपूर वाईन क्लब मागील कित्येक वर्षापासून कार्यरत आहे, आणि त्यांनी नुकतेच 4 व 5 डिसेंबर असे 2 दिवस 'आठवा' वाइन फेस्टिव्हल साजरा केला, ज्याला समाजातील सर्वच स्तरातील उच्च आणि सुशिक्षित स्त्री पुरुषांनी कुटूंबियांसोबत भरभरून प्रतिसाद दिला असल्याचेही प्रकाश पोहरे यांनी पत्रकार परिषदेत सांगितले.




वाईन संदर्भात प्रचलित गैरसमज दूर करण्यासाठी प्रसंगी आंदोलन छेडण्यात येईल. सरकारने 17 डिसेम्बर 2019 रोजी केलेली आमची मागणी त्वरित मान्य केली नाही तर दारू दुकानावरील या नावावर काळा रंग मारण्याचे आंदोलन 25 डिसेंबर, ख्रिस्तमस पासून प्रारंभ करण्यात येईल, ज्यामुळे कायदा सुवस्थेचा प्रश्न निर्माण होऊन देश तथा राज्याला शेतकरी रोषास सामोरे जावे लागेल, ज्याची जबाबदारी राज्य आणि केंद्र सरकारवर राहील असा इशारा देखील पोहरे यांनी याप्रसंगी दिला आहे. आवश्यक असल्यास यासंदर्भात अधिक व्यापक चर्चा करण्याकरिता तज्ज्ञांना आणि समाजसुधारक लोकांना सोबत घेऊन किसान ब्रिगेडची मंत्रालयात सरकार सोबत बैठक घेण्याची तयारी देखील आहे,असे प्रकाश पोहरे यांनी स्पष्ट केले.





टिप्पण्या