- लिंक मिळवा
- ईमेल
- अन्य अॅप्स
आज गुडफ्रायडे: ख्रिश्चन धर्मगुरू समाजमाध्यमांतून करणार संदेशवहन
अकोला: अकोला शहरासह संपूर्ण जिल्हयात गुडफ्रायडे अर्थात उत्तम शुक्रवारचा सण उद्या, १० एप्रिल रोजी ख्रिश्चन धर्मिय मोठया भक्तीभावाने साजरा करणार आहेत. दरम्यान, कोरोनाच्या पार्श्वभूमीवर संपूर्ण देशात जाहीर करण्यात आलेल्या लॉकडाऊनमुळे अकोला शहरातील आठ चर्चेससह जिल्हयातील सुमारे तीस चर्चेस प्रार्थनास्थळे बंद ठेवण्यात आली आहेत, त्यामुळे संबंधित चर्चेसचे धर्मगुरू आपापल्या निवासस्थानांमधून फेसबुक आणि व्हॉटसअ‍ॅपच्या माध्यमातून ख्रिश्चन बंधू भगिनींसोबत संवाद साधणार आहेत. दरम्यान, प्रभू येशू ख्रिस्तांच्या पुनरूत्थानानिमित्त जगभरात उद्या, रविवारी ख्रिश्चन धर्मीय ईस्टर संडे हा सण साजरा करणार आहेत. त्यादिवशीही समाजमाध्यमांचा प्रार्थनासभांसाठी वापर करण्यात येणार आहे.
प्रभू येशू ख्रिस्तांनी मानवाच्या पापक्षालनासाठी क्रूसखांबावर दिलेल्या बलिदानाची आठवण म्हणून गुड फ्रायडे अर्थात उत्तम शुक्रवार हा सण साजरा केला जातो. अकोला शहर आणि जिल्हयातील सर्व चर्चेस लॉकडाऊनच्या पार्श्वभूमीवर बंद असल्याने शहरातील प्रमुख चर्चेसच्या धर्मगुरूंनी उद्या, शुक्रवारी आपापल्या निवासस्थानी प्रार्थनासभा आयोजित केली आहे. या प्रार्थनासभेमध्ये धर्मगुरूंच्या कुटुंबातील सदस्य सोशल डिस्टन्सींगचे भान ठेवीत सहभागी होतील. दरम्यान, प्रत्येक चर्चच्या सदस्यांसोबत धर्मगुरू व्हॉटसअ‍ॅप आणि फेसबुकच्या माध्यमातून संवाद साधणार आहेत. यावेळी ते ख्रिश्चन धर्मियांचा पवित्र धर्मग्रंथ बायबलमधील वचनांचा आधार घेत प्रभू येशू ख्रिस्तांच्या वधस्तंभावरील बलिदानाच्या घटनेवर प्रकाश टाकतील. दरवर्षी प्रत्येक चर्चमधून प्रभू येशू ख्रिस्तांनी वधस्तंभावर खिळलेल्या अवस्थेत असताना उच्चारलेल्या सात वाक्यांवर चर्चचे धर्मगुरू आणि चर्चमधील वडीलधारी मंडळी बायबलच्या वचनांच्या आधारे भाष्य करीत असतात परंतु यावेळी ही सर्व मंडळी आपापल्या घरांमधूनच फेसबुक आणि व्हॉटसअ‍ॅपच्या माध्यमातून ख्रिश्चन बंधू भगिनींसोबत संवाद साधणार आहेत. तत्पूर्वी सर्व ख्रिश्चन बंधू भगिनी आणि अबालवृद्ध गुडफ्रायडेनिमित्त विविध गीतेही सादर करतील.
गेल्या चाळीस दिवसांपासून ख्रिश्चन धर्मियांचा लेन्थचा पवित्र महिना सुरू होता. या काळात ख्रिश्चन बंधू भगिनी उपवास आणि प्रार्थना करतात, घरोघरी कॉटेज प्रेअरचे आयोजन केले जाते परंतु यावर्षी लॉकडाऊनमुळे या कॉटेज प्रेअर्स रदद करण्यात आल्या. सर्वांनी चाळीस दिवस आपापल्या घरांमध्येच प्रार्थना केल्या. कोरोना विषाणूच्या संकटातून केवळ राज्य आणि देशच नव्हे तर संपूर्ण जगाची सुटका व्हावी यासाठी परमेश्वराकडे याचना व प्रार्थना करण्यात आली. दरम्यान, उद्या अर्थात रविवारी प्रभू येशूंच्या पुनरूत्थानानिमित्त दरवर्षी ख्रिश्चन कॉलनी येथील बेथेल सेव्हिअर्स अलायन्स चर्चच्या प्रांगणात आयोजित करण्यात येणारी प्रात:कालीन प्रार्थना आणि सकाळी ९ वाजता आयोजित करण्यात येणारी दिंडी हे कार्यक्रम रदद करण्यात आले आहेत. रविवारीही सर्व धर्मगुरू आपापल्या निवासस्थानी प्रार्थनासभा घेतील, त्याचे फेसबुक आणि व्हॉटसअ‍ॅपच्या माध्यमातून सर्वत्र थेट प्रक्षेपण करण्यात येईल, अशी माहिती बेथेल सेव्हिअर्स अलायन्स चर्चचे रेव्हरंड निलेश अघमकर यांनी दिली.
--------------------------
टिप्पण्या
टिप्पणी पोस्ट करा