आमदार रणधीर सावरकर यांच्या पुढाकाराला यश; १७ नोव्हेंबर रोजी वैद्यकीय शिक्षणमंत्री हसन मुश्रीफ यांच्या अध्यक्षतेखाली मंत्रालयात महत्त्वपूर्ण बैठक
भारतीय अलंकार न्यूज 24
नीलिमा शिंगणे जगड
अकोला : पश्चिम विदर्भातील हजारो रुग्णांसाठी अत्यंत महत्त्वपूर्ण असलेले अकोला येथील शासकीय वैद्यकीय महाविद्यालय, सर्वोपचार रुग्णालय तसेच अतिविशेषोपचार रुग्णालय पूर्ण क्षमतेने सुरू करण्याच्या दृष्टीने महत्त्वपूर्ण पाऊल उचलण्यात आले आहे. रुग्णालयातील वैद्यकीय व वैद्यकेत्तर संवर्गातील रिक्त पदे तातडीने भरण्यात येतील, अशी ग्वाही वैद्यकीय शिक्षणमंत्री हसन मुश्रीफ यांनी आमदार रणधीर सावरकर यांना दिली.
अकोला येथील शासकीय वैद्यकीय महाविद्यालय व सर्वोपचार रुग्णालय तसेच अतिविशेषोपचार रुग्णालयाचा मंजूर आकृतीबंध निश्चित करून सर्व संवर्गातील पदभरती तातडीने करावी आणि रुग्णसेवा पूर्ण क्षमतेने सुरू करावी, या मागणीसाठी आमदार रणधीर सावरकर यांनी वैद्यकीय शिक्षणमंत्री हसन मुश्रीफ यांच्याकडे बैठक आयोजित करण्याची विनंती केली होती. त्यानुसार सोमवार, दिनांक १७ नोव्हेंबर २०२६ रोजी मंत्रालयातील मंत्र्यांच्या दालनात त्यांच्या अध्यक्षतेखाली महत्त्वपूर्ण आढावा बैठक पार पडली.
या बैठकीत रुग्णालयाच्या सद्यस्थितीचा, उपलब्ध मनुष्यबळाचा तसेच आवश्यक पदभरतीचा सविस्तर आढावा घेण्यात आला. अतिविशेषोपचार रुग्णालय पूर्ण क्षमतेने कार्यान्वित करण्यासाठी आवश्यक असलेली पदभरती तातडीने केली जाईल, असे आश्वासन वैद्यकीय शिक्षणमंत्र्यांनी दिले.
तत्कालीन केंद्रीय राज्यमंत्री संजय धोत्रे यांच्या प्रयत्नातून १५० कोटींचा निधी
अकोला येथील अतिविशेषोपचार रुग्णालयाची उभारणी तत्कालीन केंद्रीय राज्यमंत्री संजय धोत्रे यांच्या अथक प्रयत्नातून प्रधानमंत्री स्वास्थ्य सुरक्षा योजनेअंतर्गत करण्यात आली. या प्रकल्पासाठी केंद्र शासनाकडून १२० कोटी रुपये, तर राज्य शासनाकडून ३० कोटी रुपये असा एकूण १५० कोटी रुपयांचा निधी मंजूर करण्यात आला होता.
रुग्णालयाचे बांधकाम पूर्ण झाल्यानंतर दिनांक ३० डिसेंबर २०२१ रोजी हे रुग्णालय शासकीय वैद्यकीय महाविद्यालय, अकोला या संस्थेकडे हस्तांतरित करण्यात आले. मात्र, आवश्यक मनुष्यबळ उपलब्ध नसल्यामुळे रुग्णालय अद्याप पूर्ण क्षमतेने सुरू होऊ शकलेले नाही. परिणामी, कोट्यवधी रुपये खर्चून उभारण्यात आलेल्या या अत्याधुनिक आरोग्य सुविधेचा अपेक्षित लाभ रुग्णांना पूर्णपणे मिळत नसल्याचा मुद्दा आमदार सावरकर यांनी बैठकीत उपस्थित केला.
Junior Resident व Senior Resident पदभरतीसाठीही परवानगीची मागणी
रुग्णालयातील मनुष्यबळाची कमतरता दूर करण्यासाठी आमदार रणधीर सावरकर यांनी विविध संवर्गांतील पदभरतीचा मुद्दा ठामपणे मांडला.
यामध्ये शासकीय वैद्यकीय महाविद्यालय व रुग्णालयाचा आवश्यक आकृतीबंध मंजूर करणे, वैद्यकीय व वैद्यकेत्तर संवर्गातील रिक्त पदे भरणे, तसेच Junior Resident आणि Senior Resident यांची पदे भरण्यासाठी शासकीय वैद्यकीय महाविद्यालयाला आवश्यक परवानगी देणे याबाबत सविस्तर चर्चा करण्यात आली.
विशेषतः अ गट आणि ब गटातील आवश्यक पदांची भरती तातडीने करण्याची आवश्यकता आमदार सावरकर यांनी अधोरेखित केली. वाढती रुग्णसंख्या, उपलब्ध खाटांची संख्या आणि आरोग्यसेवेच्या गरजा लक्षात घेऊन शासनाच्या वैद्यकीय मानकांनुसार आवश्यक मनुष्यबळ उपलब्ध करून देण्याबाबत बैठकीत चर्चा झाली.
दररोज २,५०० ते २,८०० बाह्यरुग्णांची नोंदणी
आमदार रणधीर सावरकर यांनी अकोला शासकीय वैद्यकीय महाविद्यालय व सर्वोपचार रुग्णालयाचे पश्चिम विदर्भातील आरोग्यसेवेतील महत्त्व विशद केले.
अकोला, बुलढाणा, वाशिम, हिंगोली यांसह आसपासच्या चार ते पाच जिल्ह्यांतील रुग्ण उपचारासाठी अकोला येथे येतात. त्यामुळे हे रुग्णालय पश्चिम विदर्भातील महत्त्वाचे शासकीय आरोग्यसेवा केंद्र बनले आहे.
या रुग्णालयात दररोज सुमारे २,५०० ते २,८०० बाह्यरुग्णांची (OPD) नोंदणी होते. तसेच आंतररुग्ण विभागात सुमारे १,१०० खाटा रुग्णसेवेसाठी उपलब्ध आहेत. दिवसेंदिवस वाढणारी रुग्णसंख्या आणि विस्तारणारी आरोग्यसेवा लक्षात घेता पुरेसे वैद्यकीय अधिकारी, निवासी डॉक्टर, परिचारिका आणि वैद्यकेत्तर कर्मचारी उपलब्ध असणे अत्यंत आवश्यक असल्याचे त्यांनी स्पष्ट केले.
वरिष्ठ अधिकाऱ्यांची बैठकीला उपस्थिती
या महत्त्वपूर्ण आढावा बैठकीला आमदार रणधीर सावरकर यांच्यासह वैद्यकीय शिक्षण राज्यमंत्री, वैद्यकीय शिक्षण व औषधी द्रव्ये विभागाचे सचिव, वैद्यकीय शिक्षण व संशोधन विभागाचे आयुक्त व संचालक, संबंधित विभागाचे उपसचिव, शासकीय वैद्यकीय महाविद्यालय अकोलाचे अधिष्ठाता तसेच संबंधित विभागांचे वरिष्ठ अधिकारी उपस्थित होते.
अकोला येथील अतिविशेषोपचार रुग्णालयातील आवश्यक पदभरती आणि आकृतीबंध मंजुरीचा प्रश्न मार्गी लागल्यास पश्चिम विदर्भातील रुग्णांना अत्याधुनिक आरोग्यसेवा उपलब्ध होण्यास मोठी मदत होणार आहे. त्यामुळे वैद्यकीय शिक्षणमंत्र्यांनी दिलेल्या ग्वाहीची प्रत्यक्ष अंमलबजावणी होऊन हे रुग्णालय लवकरात लवकर पूर्ण क्षमतेने सुरू होण्याकडे आता अकोलेकरांसह संपूर्ण पश्चिम विदर्भाचे लक्ष लागले आहे.
ठळक मुद्दे
- अकोला अतिविशेषोपचार रुग्णालय पूर्ण क्षमतेने सुरू करण्यासाठी पुढाकार.
- वैद्यकीय शिक्षणमंत्री हसन मुश्रीफ यांची तातडीने पदभरती करण्याची ग्वाही.
- १७ नोव्हेंबर २०२६ रोजी मंत्रालयात महत्त्वपूर्ण आढावा बैठक.
- तत्कालीन केंद्रीय राज्यमंत्री संजय धोत्रे यांच्या प्रयत्नातून १५० कोटींचा प्रकल्प.
- वैद्यकीय व वैद्यकेत्तर संवर्गातील पदभरतीचा प्रश्न ऐरणीवर.
- Junior Resident व Senior Resident पदभरतीसाठी परवानगीची मागणी.
- दररोज २,५०० ते २,८०० बाह्यरुग्णांची नोंदणी.
- पश्चिम विदर्भातील चार ते पाच जिल्ह्यांसाठी महत्त्वाचे आरोग्यसेवा केंद्र.
News Highlights
अकोला अतिविशेषोपचार रुग्णालय, Akola Super Specialty Hospital, शासकीय वैद्यकीय महाविद्यालय अकोला, रणधीर सावरकर, हसन मुश्रीफ, अकोला रुग्णालय पदभरती, Akola Government Medical College, पश्चिम विदर्भ आरोग्यसेवा, Akola, BAnews24, RandhirSavarkar, HasanMushrif,AkolaSuperSpecialityHospital,GovernmentMedicalCollegeAkola, MedicalRecruitment, Akola News, , VidarbhaNews, आरोग्यसेवा
अकोला, रणधीरसावरकर अतिविशेषोपचाररुग्णालय
टिप्पण्या
टिप्पणी पोस्ट करा