नीलिमा शिंगणे जगड
अकोला | भारतीय अलंकार न्यूज 24
आईच्या वयाच्या ८२ वर्षीय वृद्ध महिलेवर बळजबरीने अत्याचार केल्याच्या गंभीर प्रकरणात अकोट येथील अतिरिक्त जिल्हा व सत्र न्यायालयाने आरोपीला जन्मठेपेची शिक्षा सुनावली आहे. शैलेश अरुण वाघोडे (वय ३८, रा. पाटसूल, ता. अकोट, जि. अकोला) असे शिक्षा झालेल्या आरोपीचे नाव आहे. न्यायालयाने आरोपीला जन्मठेपेसह एकूण ७१ हजार रुपयांचा दंड ठोठावला असून, दंडाची रक्कम भरल्यास ती पीडितेला अपील कालावधीनंतर नुकसानभरपाई म्हणून देण्याचे आदेश दिले आहेत.
दि. ५ नोव्हेंबर २०२६ रोजी अकोट येथील अतिरिक्त जिल्हा व सत्र न्यायाधीश बी. एम. पाटील यांनी हा महत्त्वपूर्ण निकाल दिला.
नेमके प्रकरण काय?
प्राप्त न्यायालयीन माहितीनुसार, आरोपी शैलेश वाघोडे याने दि. २५ डिसेंबर २०२३ रोजी रात्री ८ ते ८.३० वाजताच्या दरम्यान फिर्यादीच्या राहत्या घरात प्रवेश केला. घराचे दोन्ही दरवाजे लावून घेतल्यानंतर त्याने फिर्यादीच्या डोक्याला भिंतीवर आपटून तिच्यावर बळजबरीने अत्याचार केला.
तसेच, याबाबत कोणाला सांगितल्यास जीवे मारण्याची धमकी दिल्याचेही फिर्यादीच्या जबानीत नमूद होते. या घटनेनंतर पीडितेने दिलेल्या तक्रारीवरून दहिहंडा पोलीस स्टेशन येथे अप क्रमांक ३७२/२०२३ नुसार गुन्हा दाखल करण्यात आला.
पोलिसांचा तपास अन् न्यायालयीन प्रक्रिया
या प्रकरणाचा तपास तत्कालीन दहिहंडा पोलीस स्टेशनचे पोलीस उपनिरीक्षक अरुण मुंढे यांनी केला. तपासादरम्यान उपलब्ध पुरावे आणि साक्षीदारांचे जबाब संकलित करून आरोपीविरुद्ध दोषारोपपत्र न्यायालयात दाखल करण्यात आले.
या खटल्यामध्ये एकूण ०७ साक्षीदारांची साक्ष नोंदविण्यात आली. त्यामध्ये ८२ वर्षीय फिर्यादी तथा पीडिता, वैद्यकीय अधिकारी आणि तपास अधिकारी पी. एस. आय. अरुण मुंढे यांच्या साक्षी महत्त्वपूर्ण ठरल्या.
सरकार पक्षातर्फे सरकारी अभियोक्ता ॲड. अजित देशमुख यांनी न्यायालयात प्रभावी युक्तिवाद केला.
आरोपीला कठोर शिक्षा; विविध कलमांनुसार दंड
सरकारी पक्षाचा युक्तिवाद आणि उपलब्ध पुरावे विचारात घेऊन न्यायालयाने आरोपीला दोषी ठरविले.
न्यायालयाने आरोपीला भारतीय दंड विधानाच्या विविध कलमांनुसार पुढीलप्रमाणे शिक्षा सुनावली :
कलम ३७६: जन्मठेपेची शिक्षा व ५० हजार रुपये दंड. दंड न भरल्यास ६ महिने सश्रम कारावास.
कलम ४५२: ७ वर्षे सश्रम कारावास व १० हजार रुपये दंड. दंड न भरल्यास ३ महिने सश्रम कारावास.
कलम ३२३: १ वर्ष सश्रम कारावास व १ हजार रुपये दंड. दंड न भरल्यास १ महिना सश्रम कारावास.
कलम ५०६: १ वर्ष सश्रम कारावास व १० हजार रुपये दंड. दंड न भरल्यास २ महिने सश्रम कारावास.
अशा प्रकारे आरोपीला एकूण ७१ हजार रुपयांचा दंड ठोठावण्यात आला आहे.
सरकारी पक्षाचा प्रभावी युक्तिवाद
सरकारी अभियोक्ता ॲड. अजित देशमुख यांनी अंतिम युक्तिवाद करताना आरोपीने स्वतःच्या आईच्या वयाच्या ८२ वर्षीय वृद्ध महिलेवर बळजबरीने लैंगिक अत्याचार करून मानवतेला काळिमा फासणारे कृत्य केले असल्याचे न्यायालयाच्या निदर्शनास आणून दिले.
अशा गंभीर गुन्ह्यात आरोपीला कोणतीही दया दाखविल्यास समाजात चुकीचा संदेश जाऊ शकतो. त्यामुळे आरोपीला त्याच्या कृत्याच्या गांभीर्यानुसार कठोरात कठोर शिक्षा देण्यात यावी, असा युक्तिवाद त्यांनी केला.
दोन्ही पक्षांचा युक्तिवाद ऐकल्यानंतर न्यायालयाने आरोपीला जन्मठेपेची शिक्षा व दंड ठोठावला.
पोलिस अधिकारी व सरकारी अभियोक्त्यांचे सहकार्य
या प्रकरणात सरकारी पक्षाला पोलीस अधीक्षक अकोला अर्चित चांडक, अकोट उपविभागीय पोलीस अधिकारी निखिल पाटील तसेच दहिहंडा पोलीस स्टेशनचे ठाणेदार गोपाल होळे यांचे मार्गदर्शन लाभले.
तसेच पोलीस हेड कॉन्स्टेबल दिनेश काळे, पोलीस नाईक महेंद्र काळे यांनी सहकार्य केले.
वृद्ध महिलेवरील गंभीर अत्याचाराच्या प्रकरणात न्यायालयाने सुनावलेली जन्मठेपेची शिक्षा हा या खटल्यातील महत्त्वपूर्ण न्यायालयीन निर्णय ठरला आहे.
ठळक मुद्दे
८२ वर्षीय वृद्ध महिलेवरील अत्याचाराचे प्रकरण.
आरोपी शैलेश वाघोडे याला न्यायालयाने ठरविले दोषी.
अकोट अतिरिक्त जिल्हा व सत्र न्यायालयाचा निकाल.
जन्मठेपेसह एकूण ७१ हजार रुपयांचा दंड.
७ साक्षीदारांच्या साक्षी ठरल्या महत्त्वपूर्ण.
सरकारी अभियोक्ता ॲड. अजित देशमुख यांचा प्रभावी युक्तिवाद.
News Highlights
अकोला न्यायालय बातमी,
अकोट सत्र न्यायालय निकाल,
वृद्ध महिलेवरील अत्याचार प्रकरण, आरोपीला जन्मठेप,
Akola Court News,
Akot Court Judgment,
Life Imprisonment News Maharashtra.
Bhartiya Alankar News 24 BAnews24
टिप्पण्या
टिप्पणी पोस्ट करा