प्रथमदर्शनी घातपाताचे संकेत नाहीत; शवविच्छेदन अहवालानंतर मृत्यूचे कारण स्पष्ट होणार, डाबकी रोड पोलिसांकडून सखोल तपास सुरू
डायल ११२ वरून मिळाली मृतदेहाची माहिती
दिनांक ७ नोव्हेंबर २०२६ रोजी दुपारी सुमारे ४ वाजताच्या दरम्यान डायल ११२ वर कॉल करून डाबकी रोड पोलीस वसाहतीच्या मागील मोकळ्या मैदानात एका अनोळखी व्यक्तीचा मृतदेह पडलेला असल्याची माहिती पोलिसांना मिळाली. माहिती मिळताच डाबकी रोड पोलीस स्टेशनचे बीट मार्शल व ड्युटी ऑफिसर यांनी तातडीने घटनास्थळी धाव घेतली.
घटनास्थळी पोहोचल्यानंतर पोलिसांनी मृतदेहाची पाहणी करून तेथे जमलेल्या नागरिकांकडे मृत व्यक्तीची ओळख पटविण्याचे आवाहन केले. यावेळी प्रफुल गजानन देशमुख आणि त्यांचे मित्र मयूर राऊत, दोघेही रा. डाबकी रोड यांनी मृतदेहाची ओळख महेश रविंद्र जोशी, रा. गोडबोले प्लॉट, अकोला अशी पटविली.
दोन दिवसांपासून होते बेपत्ता
मिळालेल्या माहितीनुसार, महेश जोशी हे ५ नोव्हेंबर २०२६ रोजी रात्री ९ वाजताच्या सुमारास त्यांची आजी शशिकला वाशिमकर, रा. लोकमान्य नगर, जुने शहर, अकोला यांच्या घरून निघून गेले होते. त्यानंतर ते बेपत्ता असल्याने त्यांच्या आई सरोज रविंद्र जोशी यांनी जुने शहर पोलीस स्टेशनमध्ये तक्रार दिली होती. त्यावरून गुन्हा क्रमांक ९६२/२०२६, भारतीय न्याय संहिता कलम १४०(३) अन्वये गुन्हा नोंदविण्यात आला होता.
फॉरेन्सिक पथकाकडून घटनास्थळाची पाहणी
मृतदेहाची माहिती मिळताच वरिष्ठ पोलीस निरीक्षक दीपक कोळी यांनी पोलीस कर्मचाऱ्यांसह घटनास्थळी भेट दिली. मृतदेहाची ओळख पटविण्यासाठी तातडीने कार्यवाही करण्यात आली. फॉरेन्सिक व्हॅन तसेच फिंगरप्रिंट तज्ज्ञांच्या मदतीने घटनास्थळाची आणि मृतदेहाची पाहणी करण्यात आली. त्यानंतर सविस्तर घटनास्थळ पंचनामा करण्यात आला.
पोलिसांच्या प्राथमिक निरीक्षणानुसार, मृतदेहाच्या डाव्या पायाच्या घोट्यापासून पंजापर्यंतचा भाग मोकाट श्वान किंवा इतर जनावरांनी कुरतडल्याचे दिसून आले. मात्र, मृतदेहाची बारकाईने पाहणी केली असता शरीरावर प्रथमदर्शनी अन्य कोणत्याही जखमा आढळून आल्या नाहीत.
शवविच्छेदन अहवालाकडे लक्ष
महेश जोशी यांचा मृत्यू नेमका कशामुळे आणि कोणत्या परिस्थितीत झाला, हे स्पष्ट होण्यासाठी मृतदेह सर्वोपचार रुग्णालयात शवविच्छेदनासाठी पाठविण्यात आला आहे. शवविच्छेदन अहवाल प्राप्त झाल्यानंतरच मृत्यूचे नेमके कारण स्पष्ट होण्याची शक्यता आहे.
या प्रकरणी प्रफुल गजानन देशमुख (वय ३३), व्यवसाय मजुरी, रा. रघुवीर नगर, चिंतामणी कॉलनी, डाबकी रोड, अकोला यांनी दिलेल्या तक्रारीवरून डाबकी रोड पोलीस स्टेशनमध्ये आकस्मिक मृत्यू क्रमांक ६१/२०२६, कलम १९४ भारतीय नागरिक सुरक्षा संहिता अन्वये नोंद करण्यात आली असून पोलिसांकडून पुढील तपास सुरू आहे.
वरिष्ठ अधिकाऱ्यांच्या मार्गदर्शनाखाली तपास
ही कार्यवाही पोलीस अधीक्षक अर्चित चांडक, प्रभारी अपर पोलीस अधीक्षक डॉ. निलेश पांडे आणि उपविभागीय पोलीस अधिकारी सुदर्शन पाटील यांच्या मार्गदर्शनाखाली पोलीस निरीक्षक दीपक कोळी, एएसआय दीपक तायडे, पोलीस हवालदार उमेश पाटील, ड्युटी ऑफिसर दिलीप पुंडे, बीट मार्शल अमंदार, सचिन कोसे, पोलीस कॉन्स्टेबल शेख नदीम, धनराज बायस्कर, मंगेश गीते व डाबकी रोड पोलीस स्टेशनच्या कर्मचाऱ्यांनी केली.
मृत्यूचे नेमके कारण शवविच्छेदन अहवालातूनच स्पष्ट होणार असल्याने या प्रकरणातील पुढील तपासाकडे नागरिकांचे लक्ष लागले आहे.
ठळक मुद्दे :
डाबकी रोड पोलीस वसाहतीमागील मैदानात आढळला होता मृतदेह.
मृतकाची ओळख २९ वर्षीय महेश रविंद्र जोशी अशी पटली.
५ नोव्हेंबरपासून होते बेपत्ता.
फॉरेन्सिक व फिंगरप्रिंट पथकाकडून घटनास्थळाची पाहणी.
प्रथमदर्शनी शरीरावर जखमा किंवा घातपाताचे स्पष्ट संकेत नाहीत.
शवविच्छेदन अहवालानंतर मृत्यूचे कारण स्पष्ट होणार.
डाबकी रोड पोलिसांकडून आकस्मिक मृत्यूची नोंद करून तपास सुरू.
BhartiyaAlankarNews24
टिप्पण्या
टिप्पणी पोस्ट करा