भारतीय अलंकार न्यूज 24
नीलिमा शिंगणे जगड
अकोला : पत्नी व ९ वर्षीय मुलीची झोपेत कुऱ्हाड आणि चाकूने हत्या केल्याप्रकरणी आरोपी मनिष किसनराव म्हात्रे, रा. संतोषी माता मंदिराजवळ, हनुमान बस्ती, अकोला याला मरेपर्यंत फाशीची शिक्षा सुनावण्यात आली आहे. द्वितीय जिल्हा व अतिरिक्त सत्र न्यायाधीश तेजवंतसिंग संधू यांनी मंगळवारी, २२ सप्टेंबर २०२६ रोजी सत्र खटला क्रमांक १७१/२०२४ मध्ये हा निर्णय दिला. न्यायालयाने आरोपीला दहा हजार रुपये दंडाचीही शिक्षा सुनावली.
झोपेत असलेल्या पत्नी व मुलीवर हल्ला
ही धक्कादायक घटना २४ एप्रिल २०२४ रोजी पहाटे उघडकीस आली. पहाटे सुमारे ५.३० वाजता स्टेशन डायरी अंमलदारामार्फत ए.एस.आय. संजय भगत यांना माहिती मिळाली की, आरोपी मनिष म्हात्रे हा त्याच्या दोन चुलत भावांसह पोलीस ठाण्यात आला असून, त्याने पत्नी व मुलीला कुऱ्हाडीने वार करून ठार केल्याचे सांगितले आहे.
माहिती मिळताच ए.एस.आय. संजय भगत यांनी घटनास्थळी जाऊन पाहणी केली. त्यावेळी आरोपीची पत्नी रश्मी मनिष म्हात्रे (वय ३०) आणि मुलगी कु. माही मनिष म्हात्रे (वय ९) या घरात रक्ताच्या थारोळ्यात मृतावस्थेत आढळून आल्या. घटनास्थळी रक्ताने माखलेली कुऱ्हाड व लोखंडी सुरी आढळून आली.
पाच वर्षांपासून पती-पत्नी विभक्त
पोलीस तपासानुसार, आरोपी मागील सुमारे पाच वर्षांपासून कौटुंबिक वादामुळे पत्नीपासून विभक्त राहत होता. रश्मी या मुलगी माहीसह मुंबई येथे राहत होत्या आणि तेथे खाजगी नोकरी करीत होत्या.
आरोपीच्या चुलत भावाच्या मुलीचे २६ एप्रिल २०२४ रोजी लग्न असल्याने रश्मी आणि माही लग्नसमारंभासाठी अकोला येथे आल्या होत्या. याच काळात पत्नीच्या चारित्र्यावर संशय घेत आरोपीने रात्री झोपेत असताना दोघींवर कुऱ्हाड व चाकूने हल्ला केल्याचे तपासात समोर आले.
मृतक १५ आठवड्यांची गर्भवती
या प्रकरणातील आणखी एक गंभीर बाब शवविच्छेदन अहवालातून समोर आली. मृतक रश्मी म्हात्रे या घटनेच्या वेळी १५ आठवड्यांच्या गर्भवती असल्याचे वैद्यकीय अहवालातून निष्पन्न झाले.
फितूर साक्षीदार असतानाही सरकार पक्षाची पुराव्यांची भक्कम बाजू
या खटल्यात आरोपीचे वडील तसेच काही शेजारी फितूर झाले होते. मात्र, सरकार पक्षाने परिस्थितीजन्य पुराव्यांची साखळी न्यायालयासमोर प्रभावीपणे मांडली.
वैद्यकीय पुरावे, न्यायवैद्यक प्रयोगशाळेचा विश्लेषण अहवाल आणि अन्य परिस्थितीजन्य पुरावे आरोपीविरुद्ध असल्याचे न्यायालयाच्या निदर्शनास आले. सरकार पक्षाने या प्रकरणात एकूण १४ साक्षीदारांची साक्ष नोंदवली. उपलब्ध पुराव्यांची साखळी आणि परिस्थितीजन्य पुराव्यांच्या आधारे न्यायालयाने आरोपीला दोषी ठरविले.
१७ सप्टेंबरला दोषी, २२ सप्टेंबरला शिक्षेचा निर्णय
या प्रकरणात १७ सप्टेंबर २०२६ रोजी द्वितीय जिल्हा व अतिरिक्त सत्र न्यायाधीश तेजवंतसिंग संधू यांच्या न्यायालयाने आरोपी मनिष किसनराव म्हात्रे याला भादंवि कलम ३०२ अंतर्गत दोषी ठरविले होते.
त्यानंतर २२ सप्टेंबर २०२६ रोजी शिक्षेवर सुनावणी होऊन न्यायालयाने आरोपीला मरेपर्यंत फाशीची शिक्षा आणि १० हजार रुपये दंड ठोठावला.
सदर खटल्यात सरकार पक्षाच्या वतीने अतिरिक्त सरकारी वकील ॲड.मंगेश मानकर यांनी बाजू मांडली. प्रकरणाचा तपास पोलीस निरीक्षक मनोज बहुरे यांनी केला.
रामदासपेठ पोलीस ठाण्याचे कोर्ट पैरवी पोलीस हेड कॉन्स्टेबल अजय वानखडे, ए.एस.आय. सुनिल दिपकवार तसेच सी.एम.एस. सेलचे पैरवी ए.एस.आय. अनवर खान यांनी प्रकरणाच्या न्यायालयीन कामकाजात सहकार्य केले.
ठळक मुद्दे
- २४ एप्रिल २०२४ रोजी दुहेरी हत्याकांड उघडकीस
- पत्नी रश्मी म्हात्रे (३०) आणि मुलगी माही म्हात्रे (९) यांची हत्या
- कुऱ्हाड व लोखंडी सुरीने हल्ला केल्याचा आरोप
- पत्नीच्या चारित्र्यावर संशय असल्याचे तपासात समोर
- मृत पत्नी १५ आठवड्यांची गर्भवती असल्याचे शवविच्छेदनातून स्पष्ट
- आरोपीचे वडील व शेजारी फितूर
- सरकार पक्षाकडून १४ साक्षीदार तपासले
- वैद्यकीय व न्यायवैद्यक पुरावे ठरले महत्त्वाचे
- १७ सप्टेंबर २०२६ रोजी आरोपी दोषी
- २२ सप्टेंबर २०२६ रोजी मरेपर्यंत फाशी व १० हजार रुपये दंडाची शिक्षा
- अतिरिक्त सरकारी वकील ॲड. मंगेश मानकर यांनी सरकार पक्षाची बाजू मांडली
- तपास अधिकारी पीआय मनोज बहुरे
News Highlights
अकोला, AkolaNews, AkolaCrime, दुहेरीहत्याकांड, फाशीचीशिक्षा, अकोलासत्रन्यायालय, न्यायालयीननिर्णय, CrimeNews, CourtVerdict, MurderCase, RamdasPethPolice, MaharashtraNews
BhartiyaAlankarNews24
टिप्पण्या
टिप्पणी पोस्ट करा