subroto-mukerjee-cup-football: राज्यस्तरीय सुब्रतो मुखर्जी फुटबॉल स्पर्धेत कोल्हापूरचा डंका! १५ वर्षे मुलांच्या गटात पुण्याला नमवत विजेतेपद

 राष्ट्रीय स्पर्धेसाठी कोल्हापूर संघ पात्र

भारतीय अलंकार न्यूज 24

नीलिमा शिंगणे जगड 

अकोला : क्रीडा व युवक संचालनालय, महाराष्ट्र राज्य, पुणे यांच्या अंतर्गत जिल्हा क्रीडा अधिकारी कार्यालय, अकोला व अकोला जिल्हा क्रीडा परिषद यांच्या संयुक्त विद्यमाने आयोजित राज्यस्तरीय सुब्रतो मुखर्जी फुटबॉल स्पर्धेत १५ वर्षे मुलांच्या गटात कोल्हापूर संघाने दमदार कामगिरी करत विजेतेपद पटकावले. अंतिम सामन्यात कोल्हापूर संघाने पुणे संघावर मात करत राष्ट्रीय स्पर्धेसाठी आपले स्थान निश्चित केले. मुंबई संघाने तृतीय क्रमांक मिळविला.

अकोला तालुक्यातील रिधोरा येथील जसनागरा पब्लिक स्कूलच्या मैदानावर दि. २४ ते २७ ऑगस्ट २०२६ या कालावधीत ही राज्यस्तरीय स्पर्धा उत्साहात सुरू आहे. राज्यभरातील विविध जिल्ह्यांमधील संघ या स्पर्धेत सहभागी झाले आहेत.

१५ वर्षे मुलांच्या गटात कोल्हापूरची बाजी

१५ वर्षे मुलांच्या गटातील सामन्यांमध्ये कोल्हापूर संघाने सातत्यपूर्ण आणि प्रभावी खेळाचे प्रदर्शन केले. अंतिम लढतीत पुणे संघाला नमवत कोल्हापूरने विजेतेपदावर आपले नाव कोरले. या विजयासह कोल्हापूर संघाची राष्ट्रीय स्तरावरील स्पर्धेसाठी निवड झाली आहे. मुंबई संघाला तृतीय स्थानावर समाधान मानावे लागले.

१७ वर्षे मुलांच्या गटातील सामन्यांना सुरुवात

दरम्यान, बुधवार, दि. २६ ऑगस्ट रोजी १७ वर्षे मुलांच्या गटातील स्पर्धेला सुरुवात झाली. पहिल्या दिवसातील सामन्यांमध्ये खेळाडूंनी चुरशीची लढत देत प्रेक्षकांची उत्सुकता वाढवली.

पहिल्या दिवसातील सामन्यांचे निकाल पुढीलप्रमाणे :

- क्रीडा प्रबोधिनी विरुद्ध अमरावती : क्रीडा प्रबोधिनी संघाचा १-० असा विजय.

- मुंबई विरुद्ध कोल्हापूर : अत्यंत अटीतटीच्या सामन्यानंतर ट्रायब्रेकरमध्ये मुंबईने ३-२ असा विजय मिळवत कोल्हापूरचा पराभव केला.

- छत्रपती संभाजीनगर विरुद्ध नागपूर : ट्रायब्रेकरमध्ये छत्रपती संभाजीनगरने नागपूरवर ५-४ अशी मात केली.

- पुणे विरुद्ध लातूर : पुणे संघाचा ३-० असा दणदणीत विजय.

- पुणे विरुद्ध नाशिक : पुणे संघाने १-० असा विजय मिळविला.

उपांत्य फेरीत कोण भिडणार?

१७ वर्षे मुलांच्या गटातील उपांत्य फेरीचे सामने गुरुवारी, दि. २७ ऑगस्ट रोजी सकाळच्या सत्रात खेळविण्यात येणार आहेत.

पहिला उपांत्य सामना छत्रपती संभाजीनगर विरुद्ध मुंबई यांच्यात होणार असून, दुसऱ्या उपांत्य सामन्यात पुणे विरुद्ध क्रीडा प्रबोधिनी हे संघ आमनेसामने येणार आहेत. त्यामुळे अंतिम फेरीत स्थान मिळविण्यासाठी दोन्ही सामन्यांमध्ये रंगतदार लढती पाहायला मिळण्याची शक्यता आहे.

अनुभवी पंचांकडून सामन्यांचे संचालन

स्पर्धेतील सामन्यांचे पंच म्हणून रोशन पांडे, केजल वंजारी, सलीम खान, तुषार ठोमरे, विनय सिडाम, शरद शिर्के, मोईन खान, शोएब खान, जुनेद खान आणि शाहिद खान यांनी काम पाहिले.

जिल्हा क्रीडा विभागाच्या मार्गदर्शनाखाली आयोजन

ही राज्यस्तरीय स्पर्धा जिल्हा क्रीडा अधिकारी सतीशचंद्र भट्ट यांच्या मार्गदर्शनाखाली आयोजित करण्यात आली आहे. स्पर्धा यशस्वी करण्यासाठी तालुका क्रीडा अधिकारी चारुदत्त नाकट, क्रीडा अधिकारी रवींद्र धारपवार, क्रीडा अधिकारी मनीषा ठाकरे, क्रीडा मार्गदर्शक सुरजकुमार दुबे, क्रीडा अधिकारी अभिजित फिरके, क्रीडा मार्गदर्शक नलिनी जाधव, जिल्हा संघटक राजेश गावंडे, परमेश्वर ठाकरे, अमित दातकर, निशांत वानखडे, राजू उगवेकर, अजिंक्य घेवडे, गजानन चाटसे यांच्यासह संबंधित अधिकारी व कर्मचारी परिश्रम घेत आहेत.

राज्याच्या विविध भागांतून आलेल्या युवा फुटबॉलपटूंना आपले कौशल्य दाखविण्यासाठी या स्पर्धेच्या माध्यमातून मोठे व्यासपीठ उपलब्ध झाले असून, १७ वर्षे मुलांच्या गटातील उपांत्य सामन्यांकडे आता क्रीडाप्रेमींचे लक्ष लागले आहे.

ठळक मुद्दे

१५ वर्षे मुलांच्या गटात कोल्हापूर विजेता

अंतिम सामन्यात पुणे संघावर मात

कोल्हापूर संघ राष्ट्रीय स्पर्धेसाठी पात्र

मुंबई संघाला तृतीय क्रमांक

१७ वर्षे मुलांच्या गटातील स्पर्धेला सुरुवात

उपांत्य फेरीत छत्रपती संभाजीनगर-मुंबई आणि पुणे-क्रीडा प्रबोधिनी यांच्यात लढत