भारतीय अलंकार न्यूज 24
नीलिमा शिंगणे जगड
अकोला : एमआयडीसी पोलीस ठाण्याच्या हद्दीत चाकूचा धाक दाखवून नागरिकांकडून मोबाईल व रोख रक्कम जबरदस्तीने हिसकावून घेणाऱ्या चार आरोपींना एमआयडीसी पोलिसांनी अटक केली आहे. आरोपींच्या चौकशीत जबरी चोरीचे तीन गुन्हे उघडकीस आले असून, त्यांच्याकडून मोटारसायकली, लोखंडी चाकू, मोबाईल व रोख रकमेसह एकूण २४ हजार १०० रुपयांचा मुद्देमाल जप्त करण्यात आला आहे.
दि. १९ जुलै २०२६ रोजी रात्री सुमारे ९.३० वाजता एमआयडीसी परिसरातील मारोती पेवर्स, एमआयडीसी क्र. ४, अकोला येथे प्रेम दीपक कोल्हे (वय १८, रा. भांबेरी, जि. अकोला) हे आपल्या मित्रासोबत रस्त्यावर फिरत असताना मोटारसायकलवरून आलेल्या तीन अनोळखी व्यक्तींनी त्यांना मारहाण करून चाकूचा धाक दाखवला.
यावेळी आरोपींनी प्रेम कोल्हे यांच्याकडील रिअलमी कंपनीचा अंदाजे १५ हजार रुपयांचा मोबाईल, तसेच त्यांचे मित्र अर्जुन लाल बेठेकर यांच्याकडील अंदाजे २ हजार रुपयांचा मोबाईल जबरदस्तीने हिसकावून घेतला. त्यानंतर दिलीप सिताराम माहुरे (वय ५७, रा. राहुल सिद्धस, एमआयडीसी क्र. ४, अकोला) यांना नारायण दालमिलजवळ चाकूचा धाक दाखवून मारहाण करत त्यांच्या जवळील १ हजार ७०० रुपये रोख रक्कमही हिसकावून नेली.
या प्रकरणी एमआयडीसी पोलीस ठाण्यात अप. क्र. ३६२/२०२६ अन्वये गुन्हा दाखल करण्यात आला.
या गुन्ह्याचा तपास सुरू असताना पोलिसांनी गोपनीय बातमीदारांकडून मिळालेली माहिती तसेच तांत्रिक विश्लेषणाच्या आधारे संशयितांचा शोध सुरू केला.
तपासादरम्यान एमआयडीसी परिसरातील आणखी दोन जबरी चोरीचे गुन्हे समोर आले. त्यामध्ये अप. क्र. ३४५/२०२६ मध्ये फिर्यादी लक्ष्मण चव्हाण यांना चाकूचा धाक दाखवून त्यांच्याकडील रिअलमी मोबाईल व ५०० रुपये रोख जबरदस्तीने घेण्यात आले होते.
तर दि. २७ मे २०२६ रोजी फिर्यादी गजानन महादेव भटकर यांना चाकूचा धाक दाखवून त्यांच्याकडील ४ हजार रुपये रोख जबरदस्तीने हिसकावून घेण्यात आले होते. या प्रकरणी अप. क्र. ३२४/२०२६ अन्वये गुन्हा दाखल करण्यात आला होता.
तांत्रिक विश्लेषण आणि गोपनीय माहितीच्या आधारे पोलिसांनी आकाश उर्फ करण विनोद थुकेकर, यश उर्फ राम संतोष नवले, अभिजित उर्फ अभि विश्वनाथ वैरागळे आणि एक महिला, सर्व रा. कृषीनगर, अकोला, यांना ताब्यात घेतले.
पोलिसांनी केलेल्या चौकशीत आरोपींनी एमआयडीसी पोलीस ठाण्यात दाखल असलेल्या अप. क्र. ३६२/२०२६, ३४५/२०२६ आणि ३२४/२०२६ या तीन गुन्ह्यांमध्ये चाकूचा धाक दाखवून मोबाईल व रोख रक्कम हिसकावून घेतल्याची कबुली दिल्याचे पोलिसांनी सांगितले.
आरोपींकडून पोलिसांनी पल्सर मोटारसायकल, सुझुकी ॲक्सेस मोटारसायकल, लोखंडी चाकू, रिअलमी कंपनीचा मोबाईल आणि ३ हजार ३०० रुपये रोख, असा एकूण २४ हजार १०० रुपयांचा मुद्देमाल जप्त केला आहे.
ही कारवाई पोलीस अधीक्षक अचित चांडक, अपर पोलीस अधीक्षक बी. चंद्रकांत रेड्डी आणि उपविभागीय पोलीस अधिकारी सुदर्शन पाटील यांच्या मार्गदर्शनाखाली करण्यात आली.
एमआयडीसी पोलीस ठाण्याचे सपोनि तथा ठाणेदार विजय जाधव, पोउपनि देवीदास फुलउंबरकर, पोहेकॉ विजय अंभोरे, सतीश प्रधान, तसेच पोकॉ निलेश वाकोडे आणि अथर खान यांनी तपास करून ही कारवाई यशस्वी केली.
या कारवाईमुळे एमआयडीसी परिसरातील जबरी चोरीच्या तीन गुन्ह्यांची उकल झाली असून, पोलिसांच्या तपासामुळे इतरही काही घटनांचा संबंध समोर येतो का, याचा तपास सुरू आहे.
टिप्पण्या
टिप्पणी पोस्ट करा