दिल्लीतील विद्यार्थी आंदोलनाला शिवसेनेचा पाठिंबा; धर्मेंद्र प्रधान यांच्या राजीनाम्याची मागणी, मोदी सरकारवर उद्धव ठाकरेंची जोरदार टीका
जंतरमंतरवरील विद्यार्थी आंदोलनाला उद्धव ठाकरेंची भेट.
केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी.
"मन की बात ऐकवणारे जन की बात ऐकत नसतील तर ती हुकूमशाही."
विद्यार्थ्यांवरील लाठीचार्जचा तीव्र निषेध.
"तरुण हे देशाचे भविष्य, त्यांचा आवाज दडपणे अयोग्य."
सरकारने विद्यार्थ्यांशी संवाद साधावा, अशी मागणी.
आंदोलनकर्त्यांवर पाकिस्तानी असल्याचे आरोप करण्यावरही टीका.
"देशात साचलेला १२ वर्षांचा असंतोष आता उफाळून येत आहे."
भारतीय अलंकार न्यूज 24
नवी दिल्ली | नीति वत्स
दिल्लीतील जंतरमंतर येथे केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी सुरू असलेल्या विद्यार्थी आंदोलनाला शिवसेना (उद्धव बाळासाहेब ठाकरे) पक्षाने जाहीर पाठिंबा दिला आहे. शिवसेना पक्षप्रमुख उद्धव ठाकरे यांनी मंगळवारी जंतरमंतर येथे आंदोलनकर्त्या विद्यार्थ्यांची तसेच कॉक्रोच जनता पार्टीचे संस्थापक अभिजीत दिपके यांची भेट घेत त्यांच्या आंदोलनाला समर्थन दर्शविले.
यानंतर आज बुधवारी दिल्लीतील शिवसेना नेते व खासदार संजय राऊत यांच्या निवासस्थानी पत्रकार परिषद घेऊन उद्धव ठाकरे यांनी केंद्र सरकारवर जोरदार हल्लाबोल केला.
उद्धव ठाकरे म्हणाले, "लोकशाहीमध्ये संवाद आवश्यक असतो. स्वतःची 'मन की बात' सर्वांना ऐकवणारे जर 'जन की बात' ऐकत नसतील, तर ती लोकशाही नसून हुकूमशाही आहे."
त्यांनी विद्यार्थ्यांवरील लाठीचार्जचा निषेध करत, "तरुण हे देशाचे भविष्य आणि भाग्यविधाते आहेत. त्यांच्या भविष्याचा प्रश्न असेल तर त्यांनी राजीनामा मागण्यात काय चुकीचे आहे?" असा सवाल उपस्थित केला.
विद्यार्थ्यांना आधार देण्याची गरज असल्याचे सांगत ते म्हणाले की, "आज या तरुणांना साथ दिली तर तेच उद्या देशाचे आधारस्तंभ ठरतील. पण त्यांचा आवाज दडपून हुकूमशाही लादण्याचा प्रयत्न झाला तर ही पिढी गप्प बसणार नाही."
सरकारने विद्यार्थ्यांशी संवाद साधण्याऐवजी त्यांच्यावर बलप्रयोग केल्याचा आरोप करत उद्धव ठाकरे म्हणाले की, "सोनम वांगचुक यांच्या उपोषणापूर्वीच आंदोलनकर्ते सरकारशी चर्चा करण्यासाठी आले होते. त्यावेळी संवाद झाला असता तर हा प्रश्न सुटला असता."
आंदोलनकर्त्यांवर पाकिस्तानी असल्याचे आरोप करण्यावरही त्यांनी टीका केली. "विद्यार्थ्यांना पाकिस्तानी म्हणणारे सत्ताधारी स्वतःमध्ये कुणी पाकिस्तानी नाही ना, हे आधी पाहावं," असा टोला त्यांनी लगावला.
राष्ट्रीय स्वयंसेवक संघाचे सरकार्यवाह दत्तात्रेय होसबाळे यांनी पाकिस्तानशी संवाद ठेवण्याबाबत केलेल्या वक्तव्याचाही उल्लेख करत ठाकरे म्हणाले, "पाकिस्तानशी चर्चा करण्याची तयारी दाखवता, मग आपल्या देशातील विद्यार्थ्यांशी बोलण्यात कमीपणा का वाटतो?"
विद्यार्थिनींवरील कथित गैरवर्तन आणि लाठीचार्जचा उल्लेख करत त्यांनी सरकारवर कठोर शब्दांत टीका केली. "महिलांशी आणि मुलींशी झालेली कथित वागणूक ही हिंदू संस्कृती नव्हे, तर रावण संस्कृती आहे," असेही ते म्हणाले.
शिक्षणमंत्री धर्मेंद्र प्रधान यांचा राजीनामा घेणार नसल्याच्या भूमिकेवरही त्यांनी निशाणा साधला. "ही सत्तेची मस्ती आहे आणि तिच्याविरोधात देशभरात असंतोष निर्माण झाला आहे. हा अचानक निर्माण झालेला रोष नसून गेल्या १२ वर्षांत साचलेला असंतोष आता उफाळून बाहेर पडत आहे," असे उद्धव ठाकरे यांनी सांगितले.
टिप्पण्या
टिप्पणी पोस्ट करा