भारतीय अलंकार न्यूज 24
नीलिमा शिंगणे जगड
अकोला | अकोला जिल्ह्यातील बार्शिटाकळी तालुक्यात घडलेल्या तब्बल १२ वर्षे जुन्या विळा हल्ला प्रकरणात जिल्हा व सत्र न्यायालयाने महत्त्वपूर्ण निर्णय दिला आहे. जिल्हा व सत्र न्यायाधीश-२ तथा अतिरिक्त सत्र न्यायाधीश तेजवंत सिंघ संधू यांनी आरोपी सारंगधर शामराव तराळे (वय ४२, रा. पाटखेड, ता. बार्शिटाकळी) याला भारतीय दंड विधान कलम ३२६ अंतर्गत ५ वर्षे सक्त मजुरी व ₹१०,००० दंडाची शिक्षा सुनावली. तसेच दंड न भरल्यास ३ महिन्यांची सक्त कैद भोगावी लागणार असून, दंडाच्या रकमेतून ₹७,००० पीडिताला नुकसानभरपाई म्हणून देण्याचे आदेशही न्यायालयाने दिले.
फिर्यादी प्रशांत महादेव फाळके यांनी ८ जानेवारी २०१४ रोजी बार्शिटाकळी पोलीस ठाण्यात तक्रार दाखल केली होती. त्यानुसार, पाटखेड येथे सकाळी साडेआठच्या सुमारास आरोपीने फिर्यादीकडे रागाने पाहिल्याच्या कारणावरून वाद निर्माण झाला. त्यानंतर आरोपीने हातातील लोखंडी विळ्याने फिर्यादीवर जीवघेणा हल्ला केला.
या हल्ल्यात फिर्यादीच्या डाव्या हाताचा अंगठा तुटून पडला, डाव्या हाताच्या दंडावर गंभीर जखम झाली तसेच उजव्या हातालाही दुखापत झाली होती.
या प्रकरणी बार्शिटाकळी पोलिसांनी भारतीय दंड संहितेच्या कलम ३२६ व ५०४ अंतर्गत गुन्हा दाखल केला. तत्कालीन तपास अधिकारी पीएसआय संजय सोनवणे यांनी तपास पूर्ण करून दोषारोपपत्र न्यायालयात दाखल केले.
प्रकरणात एकूण आठ साक्षीदारांची साक्ष नोंदविण्यात आली होती. मात्र, ८ नोव्हेंबर २०१९ रोजी प्रथम श्रेणी न्यायदंडाधिकारी, बार्शिटाकळी यांनी आरोपीची निर्दोष मुक्तता केली होती.
सहाय्यक सरकारी अभियोक्ता यांनी केलेल्या प्रस्तावानुसार तत्कालीन जिल्हाधिकारी जितेंद्र पापळकर यांनी अपील दाखल करण्यास मंजुरी दिली. त्यानंतर अतिरिक्त सरकारी वकील राजेश आकोटकर यांनी जिल्हा व सत्र न्यायालय, अकोला येथे अपील दाखल केले.
अपीलवरील सुनावणीनंतर न्यायालयाने बार्शिटाकळी न्यायालयाचा निर्दोष मुक्ततेचा आदेश फेटाळून लावत आरोपीला दोषी ठरवत शिक्षा सुनावली.
या प्रकरणात अतिरिक्त सरकारी वकील राजेश आकोटकर व आशिष फुंडकर यांनी सरकार पक्षाची बाजू प्रभावीपणे मांडली. तसेच एएसआय किसन पातोंड (बार्शिटाकळी पोलीस स्टेशन) आणि कोर्ट पैरवी एएसआय सुनिल दिपकवार यांनी न्यायालयीन कामकाजात सहकार्य केले.
१२ वर्षे जुन्या विळा हल्ला प्रकरणात महत्त्वाचा निकाल.
निर्दोष मुक्त आरोपीला अपीलमध्ये ५ वर्षांची सक्त मजुरी.
₹१०,००० दंड; त्यापैकी ₹७,००० पीडिताला नुकसानभरपाई.
बार्शिटाकळी न्यायालयाचा निर्दोष मुक्ततेचा आदेश सत्र न्यायालयाने फेटाळला.
कलम ३२६ अंतर्गत आरोपी दोषी ठरला.
टिप्पण्या
टिप्पणी पोस्ट करा