ठळक मुद्दा
नीलिमा शिंगणे जगड
अकोला | भारतीय अलंकार न्युज 24
अकोला शहरातील गौरक्षण रोड परिसरातील आदर्श कॉलनी येथे असलेल्या सप्तश्रृंगी ज्वेलर्समध्ये भरदिवसा बंदुकीचा धाक दाखवत सोन्या-चांदीच्या ऐवजाची लूट झाल्याची धक्कादायक घटना घडली. वर्दळीच्या भागात घडलेल्या या धाडसी दरोड्यामुळे शहरात खळबळ उडाली असून व्यापारी वर्गात भीतीचे वातावरण निर्माण झाले आहे.
मिळालेल्या माहितीनुसार, सराफा व्यवसायिक दुकानात एकटे असताना हातात बंदूक घेऊन एक अज्ञात दरोडेखोर दुकानात शिरला. आरोपीने व्यवसायिकाला बंदुकीचा धाक दाखवत दुकानातील मौल्यवान सोन्या-चांदीचा ऐवज लुटला. काही क्षणांतच आरोपी घटनास्थळावरून पसार झाला.
घटनेनंतर व्यवसायिकाने आरडाओरड केली. मात्र, तोपर्यंत आरोपी फरार झाला होता. सूत्रांच्या माहितीनुसार, दरोडेखोर एकटाच आला होता. या घटनेची माहिती मिळताच खदान पोलीस घटनास्थळी दाखल झाले असून परिसरातील सीसीटीव्ही फुटेजची तपासणी सुरू करण्यात आली आहे.
या प्रकरणी खदान पोलिस ठाण्यात गुन्हा दाखल करण्याची प्रक्रिया सुरू असून आरोपीचा शोध घेण्यासाठी विशेष पथक कार्यरत करण्यात आले आहे. दिवसाढवळ्या झालेल्या या दरोड्यामुळे शहरातील कायदा आणि सुव्यवस्थेवर प्रश्नचिन्ह उपस्थित केले जात आहे.
उपविभागीय पोलीस अधिकारी सुदर्शन पाटील यांनी घटनेची प्राथमिक माहिती देत आरोपीचा लवकरच शोध घेण्यात येईल, असे सांगितले.
आदर्श कॉलनीतील सप्तश्रृंगी ज्वेलर्समध्ये भरदिवसा दरोडा
बंदुकीचा धाक दाखवत सोन्या-चांदीच्या ऐवजाची लूट
दरोडेखोर एकटाच आल्याची प्राथमिक माहिती
घटनेनंतर आरोपी फरार; पोलिसांकडून शोधमोहीम सुरू
व्यापारी वर्गात भीतीचे वातावरण, सुरक्षा व्यवस्थेवर प्रश्न
टिप्पण्या
टिप्पणी पोस्ट करा