police-constable-caught-ACB: त्या लाचखोर पोलीस शिपायास दोन दिवसाची पोलीस कोठडी

  file image 

भारतीय अलंकार न्यूज 24

नीलिमा शिंगणे जगड 

अकोला: अँटी करप्शन ब्युरो, अमरावती पथकाने मोठी कारवाई करीत पातूर पोलीस ठाण्यात कार्यरत पोलीस शिपाई पवन सुनील भाकरे  (वय 36 वर्षे, पद पोलीस शिपाई  (वर्ग-3), पो.स्टे. पातुर जि. अकोला. रा. वसंत नगर मानोरा ता. मानोरा जि. वाशिम)  यास काल 21 फेब्रुवारीला तीन हजार रूपयेची लाच घेताना रंगेहाथ पकडले होते. एसीबीने आरोपीला आज न्यायालय समक्ष हजर केले असता, दोन्ही पक्षाचा युक्तीवाद ऐकल्यानंतर न्या. श्रीमती भदाणे यांनी आरोपीस दोन दिवसांची पोलीस कोठडी सुनावली. सरकार पक्षा तर्फे ॲड. राजेश अकोटकर यांनी काम पाहिले. यावेळी ACB अमरावती तर्फे तपास अधिकारी पोलीस निरीक्षक भरत जाधव उपास्थित होते.

थोडक्यात हकिगत अशी की, या प्रकरणातील तक्रारदार यांच्या विरूध्द पातुर पोलीस ठाण्यात यापुर्वी देशी दारू विक्रीचे गुन्हे दाखल आहेत. तक्रारदार यांनी सध्या दारू विकीचा धंदा बंद केला असुन, सध्या मोलमजुरी करीत आहे. मात्र आरोपीने तक्रारदार यांना मागील गुन्हयाच्या अभिलेखावरून तडीपारीची कारवाई न करण्याकरीता पाच हजार रूपये लाचेची मागणी केली. यामुळे तक्रारदार यांनी 20 फेब्रुवारीला  ला.प्र.वि. अकोला येथे तक्रार दिली होती.

या तक्रारीवरुन 20 फेब्रुवारी रोजी कारवाई दरम्यान आरोपी भाकरे याने पंचासमक्ष करण्यात आलेल्या पडताळणी पाच हजार रूपये मागणी करून तडजोडीअंती तीन हजार रुपये लाच रक्कमेची मागणी करून स्विकारण्याची समंती दर्शविली.

तर 21 फेब्रुवारी 2025 रोजी पंचासमक्ष आयोजीत सापळा कार्यवाही दरम्यान आरोपी लोकसेवक पवन सुनिल भाकरे याने तक्रारदार यांचेकडून लाचेची रक्कम तीन हजार रुपये पंचासमक्ष स्विकारली. यावरुन काल शुक्रवार 21 फेब्रुवारी रोजी आरोपी लोकसेवक यांना लाचेच्या रक्कमेसह ताब्यात घेण्यात आलेले असुन पो.स्टे. पातुर, अकोला येथे गुन्हा नोंद करण्यात आला होता. आज आरोपी पोलीस शिपाई पवन भाकरे यास न्यायालयासमोर हजर केले असता, न्यायलयाने दोन दिवसाची पोलीस कोठडी सुनावली.

सदरची कार्यवाही मारुती जगताप, पोलीस अधीक्षक, अन्टी करप्शन ब्युरो, अमरावती परिक्षेत्र, अमरावती,  सचिंद्र शिंदे, अपर पोलीस अधीक्षक, अन्टी करप्शन ब्युरो, अमरावती परिक्षेत्र, अमरावती, मिलिंदकुमार बहाकर, पोलीस उपअधिक्षक, ला.प्र.वि., अकोला, यांचे मार्गदर्शनाखाली सापळा अधिकारी पो.नि. भारत जाधव यांच्यासह दिगांबर जाधव, उपेंद्र थोरात, संदिप ताले, किशोर पवार, चंद्रकांत जनबंधु यांनी पार पाडली.