ajit-pawar-to-visit-bidkar-family: बिडकर कुटुंबियांच्या भेटीला उपमुख्यमंत्री अजित पवार उद्या अकोल्यात

   file photo 

भारतीय अलंकार न्यूज 24

नीलिमा शिंगणे जगड 

अकोला : राज्याचे उपमुख्यमंत्री अजित पवार उद्या (दि. 15 फेब्रुवारी) अकोला जिल्हा दौ-यावर येत असल्याची माहिती अधिकृत सुत्रांनी दिली आहे. या दौ-यात ते माजी आमदार स्व. तुकाराम बिडकर यांच्या कुटुंबियांची सांत्वनपर भेट घेणार आहेत.

असा आहे दौरा 

उद्या शनिवार 15 फेब्रुवारी रोजी ना. पवार यांचे छत्रपती संभाजीनगर येथून विमानाने शिवणी विमानतळ येथे दुपारी 3.25 वाजता आगमन होईल. मोटारीने प्रयाण करीत दुपारी 3.40 वाजता माजी आमदार स्व. तुकाराम बिडकर यांच्या रामनगर अकोला येथील निवासस्थानी आगमन व स्व. बिडकर यांच्या कुटुंबियांची सांत्वनपर भेट घेतील. दुपारी 4.40 वाजता त्यांचे शिवणी विमानतळ येथे आगमन व विमानाने पुण्याकडे प्रयाण करतील.

राष्ट्रवादी काँग्रेस पक्षातील माझा सहकारी हरपला- अजित पवार 

विदर्भ वैधानिक विकास महामंडळाचे माजी अध्यक्ष तथा मुर्तीजापूर विधानसभा मतदार संघाचे माजी आमदार तुकाराम बिरकड यांच्या अपघाती निधनाची बातमी ऐकून धक्का बसला. त्यांच्या निधनानं विदर्भाचा कर्तृत्ववान सुपुत्र, चळवळीत काम करणारा सच्चा कार्यकर्ता, राष्ट्रवादी काँग्रेस पक्षातील माझा सहकारी हरपला आहे. मी त्यांना भावपूर्ण श्रध्दांजली अर्पण करतो.

माजी आमदार तुकाराम बिरकड हे महाराष्ट्राच्या सामाजिक प्रश्नांची जाण असलेलं, विदर्भाच्या विकासासाठी कार्यशील असलेलं नेतृत्व होतं. तीन महिन्यापूर्वी झालेल्या अपघातातून ते नुकतेच सावरले होते. शिर्डी येथे झालेल्या राष्ट्रवादी काँग्रेस पक्षाच्या शिबिराला सुध्दा ते उपस्थित होते. मात्र पुन्हा एकदा अपघातानंच त्यांचा बळी घेतला, ही घटना अत्यंत क्लेशकारक आहे. त्यांचं अकाली निधन हा राष्ट्रवादी परिवारासाठी मोठा धक्का आहे, अशा शब्दात अजित पवार यांनी आपल्या शोक संवेदना व्यक्त केल्या आहे.

चिरंजीव पवन यांनी दिला मुखाग्नी 

दरम्यान तुकाराम बिडकर यांच्या पार्थिवावर आज शुक्रवारी दुपारी कुंभारी बाभूळगाव मार्गावरील बीपीएड कॉलेजच्या मैदानावर अंत्यसंस्कार पार पडले. त्यांचे चिरंजीव पवन यांनी त्यांना मुखाग्नी दिला. 

यावेळी राज्याचे माजी उपमुख्यमंत्री आमदार छगन भुजबळ, अकोल्याचे पालकमंत्री ना. आकाश फुंडकर, आमदार वसंत खंडेलवाल, आमदार हरीश पिंपळे, माजी राज्यमंत्री गुलाबराव गावंडे, माजी मंत्री अजहर हुसेन, माजी आमदार दाळू गुरुजी, हरिभाऊ भदे, डॉ. संतोष कोरपे, ज्येष्ठ पत्रकार प्रकाश पोहरे, अभिनेता सागर साळुंखे, माजी आमदार बळीराम सिरस्कार आदी उपस्थित होते.