district-wine-bar-association-: जिल्हा वाईन बार असोसिएशन अध्यक्षांच्या वाईन बारला ठोकले सील; राज्य उत्पादन शुल्क विभागाची कारवाई संशयाच्या भोवऱ्यात

ठळक मुद्दे 

अतुल पवनीकर यांचे आमरण उपोषण सुरू 

आमदार नितीन देशमुख भेटीला 

भारतीय अलंकार न्यूज 24

नीलिमा शिंगणे जगड 

अकोला : जिल्ह्यात अवैध दारू विक्री, बुटलिकिंग फोफावली असून याच्या विरोधात वाईन बार असोसिएशनने गेल्या सहा महिन्यांपूर्वी निवेदन देत राज्य उत्पादन शुल्क विभागाला या संदर्भात कारवाई करण्याची मागणी केली होती. तेव्हापासूनच उत्पादन शुल्क विभागाने या निवेदनकर्त्याना विविध प्रकरणात गोवण्याचा प्रयत्न करीत त्यांच्यावर कारवाया केल्या. शनिवारी दुपारी राज्य उत्पादन शुल्क विभागाच्या अधिकाऱ्यांनी या बुटलिकींग, अवैध दारू विक्री विरोधात आवाज उचलणाऱ्या वाईन बार असोसिएशनच्या अध्यक्षांची बार सील केल्याने वातावरण चांगलेच चिघळले असून प्रजासत्ताक दिनाच्या पूर्वसंध्येला असोसिशनचे अध्यक्ष अतुल पवनीकर जिल्हाधिकारी कार्यालयावर आमरण उपोषणाला बसले आहे. 

राज्य उत्पादन शुल्क विभागाच्या बेताल कारभाराविरुद्ध गेल्या सहा ते सात महिन्यांपासून वाईन बार असोसिएशनच्या वतीने आवाज उठविणे सुरू आहे. जिल्ह्यात मोठ्या प्रमाणात अवैध दारू विक्री, महामार्गावरील ढाबे, हॉटेलवर होणारी सर्रास दारू विक्री, बुटलिकिंग या सर्व गैर प्रकाराविरुद्ध वाईन बार असोसिएशनच्या वतीने राज्य उत्पादन शुल्क विभाग आणि जिल्हाधिकारी यांना निवेदन देत कारवाईची मागणी करण्यात आली होती. मागणी रास्त असताना सुद्धा राज्य उत्पादन शुल्क विभागाच्या अधीक्षक सीमा झावरे यांनी थेट निवेदन देण्याकरिता उपस्थित असलेल्या वाईन बार असोसिएशनच्या पदाधिकारी यांनाच नियमांचे धडे शिकवीत कारवाईत अडकविण्याच्या धमक्या दिल्या. परिणामी त्यावेळी वाईन बार असोसिएशनच्या उपस्थित  पदाधिकारी यांनी थेट ठिय्या आंदोलन केले होते, सदर ठिय्या आंदोलन मोडण्यासाठी त्यावेळी खुद्द जिल्हाधिकारी यांनी मध्यस्थी केली करीत समजूत काढली होती. मात्र तेव्हापासून नानाविध प्रकारच्या नियमावली समोर करीत बेकायदेशीर कारवायांचा सपाटा उत्पादन शुल्क विभागाच्या अधिकाऱ्यांनी लावला होता. या कारवाईत तब्बल 20 ते 25 बार चालकांना गोवल्या गेल्याचे निवेदनात नमूद आहे. शनिवारी या कारवाईचा भाग म्हणून वाईन बार असोसिएशनच्या अध्यक्षांच्याच वाईन बारला सील ठोकण्यात आले. परिणामी वाईन बार असोसिएशनचे अध्यक्ष अतुल पवनीकर हे जिल्हाधिकारी कार्यालय समोर आमरण उपोषणाला बसले आहे. यावेळी पदाधिकारी, बार संचालक सुद्धा उपस्थित होते. 

कोणतीही पूर्वसूचना न देता ठोकले सील 

शनिवारी शेगाव नाका भौरद येथील यश वाईन बारला दुपारी राज्य उत्पादन शुल्क विभागाच्या वतीने सील ठोकण्यात आले. विशेष म्हणजे या कारवाई पूर्वी कोणतीही पूर्वसूचना न दिल्याने ही कारवाई संशयाच्या भोवऱ्यात अडकली आहे. 

शासनाला कोट्यवधींचा चुना 

जिल्ह्यात बुटलिकिंग मोठ्या प्रमाणात अवैध दारूची विक्री फोफावली आहे. यामुळे शासन महसुलाला मोठ्या प्रमाणात घट होत आहे. ही घट महिण्याकाठी कोट्यवधी रुपयांच्या घरात असल्याची माहिती सूत्रांकडून प्राप्त आहे. 

आ. देशमुख यांची उपोषण मंडपाला भेट 

वाईन बार असोसिएशनच्या वतीने सुरू असलेल्या आमरण उपोषणाची माहिती मिळताच ते उपोषण स्थळी दाखल झाले. यावेळी राज्य उत्पादन शुल्क विभागाच्या बेताल कारभारावर नाराजी व्यक्त करीत सदर प्रश्न जिल्हा नियोजन बैठक आणि आगामी अधिवेशनात उचलणार असल्याची ग्वाही त्यांनी दिली.