maharashtra-cm-bjp-celebrate: देवेंद्र फडणवीस यांची निवड जाहीर होताच अकोल्यात जल्लोष ; बैठकीत अकोल्याला महत्वपूर्ण स्थान

भारतीय अलंकार न्यूज 24

नीलिमा शिंगणे जगड 

अकोला : भाजपच्या विधिमंडळ

गटनेतेपदी देवेंद्र फडणवीस यांची निवड झाली असून महाराष्ट्राच्या मुख्यमंत्रीपदी ते उद्या 5 डिसेंबर रोजी विराजमान होणार आहे. देवेंद्र फडणवीस यांची निवड जाहीर होताच अकोल्यात भाजप कार्यालयासमोर कार्यकर्त्यांनी मोठा जल्लोष केला. 

केंद्रीय निरीक्षकांच्या उपस्थितीत गटनेता निवडीसाठी आमदारांच्या बोलवलेल्या बैठकीमध्ये भाजपचे प्रदेश सरचिटणीस तथा अकोला पूर्वचे आमदार रणधीर सावरकर यांच्यावर महत्त्वपूर्ण जबाबदारी सोपवण्यात आली होती. यानिमित्ताने भाजपच्या बैठकीत अकोल्याला बहुमान मिळाला, हे उल्लेखनीय आहे.

महाराष्ट्र विधानसभा निवडणुकीत महायुतीला स्पष्ट बहुमत मिळाले. 132 आमदारांसह भाजप सर्वात मोठा पक्ष ठरला. महायुतीमध्ये मुख्यमंत्री पदावरून तिढा कायम होता. मात्र आज भाजपच्या विधिमंडळ गटनेतेपदी देवेंद्र फडणवीस यांची निवड करण्यात आली. सोबतच मुख्यमंत्री पदावर ते विराजमान होण्याचा मार्ग मोकळा झाला. गटनेता निवडण्यासाठी पक्ष निरीक्षक केंद्रीय अर्थमंत्री निर्मला सीतारामण आणि विजय रुपाणी यांच्या उपस्थितीत भाजपच्या आमदारांची बैठक झाली.  बैठकीत सर्वानुमते देवेंद्र फडणवीस यांच्या नावावर शिक्कामोर्तब झाला.

या महत्त्वपूर्ण बैठकीच्या सूत्रसंचालनाची  जबाबदारी प्रदेश सरचिटणीस तथा अकोला पूर्वचे आमदार रणधीर सावरकर यांच्यावर सोपविण्यात आली होती. आमदार रणधीर सावरकर यांनी अभ्यासपूर्ण सूत्रसंचालन केले.  राज्यातील अत्यंत महत्त्वाच्या राजकीय घडामोडीत जिल्ह्यातील आमदारांना मानाचे स्थान मिळाल्याने अकोलेकरांना आनंद झाला. 

या बैठकीत फडणवीस यांची गटनेतेपदी निवड झाल्याचे जाहीर होताच अकोला शहरातील भाजप कार्यालयासमोर कार्यकर्त्यांनी जल्लोष केला.यावेळी जोरदार आतषबाजी, ढोल- ताश्याच्या गजरात नृत्य सादर करून आनंद साजरा केला. तर पेढे वाटून नागरिकांचे तोंड गोड करण्यात आले. 

खासदार अनुप धोत्रे, आमदार वसंत खंडेलवाल, विजय अग्रवाल, किशोर मंगते, जयंत मसने यांच्या नेतृत्वात आयोजित कार्यक्रमात माजी महापौर सुमन गावंडे, डॉ. किशोर मालोकार, संजय गोटफोडे, देवाशिष काकड, गिरीश जोशी, दिलीप मिश्रा, रमेश अलकरी, संध्या लोहकपुरे, चंदा ठाकूर, सारिका जयस्वाल, नितीन ताकवाले, विजय इंगळे, संजय बडोणे, कृष्णा शर्मा, आनंद बलोदे, पवन पाडिया, सागर शेगोकार आदी भाजप पदाधिकारी व कार्यकर्ते उपस्थित होते.