christmas-celebrate-akola-city: अकोला शहरात नाताळ हर्षोल्हासात साजरा; जिल्ह्यातील एकूण 30 चर्चेसमध्ये प्रार्थना सभा

भारतीय अलंकार न्यूज 24

नीलिमा शिंगणे जगड 

अकोला: ' जिंगल बेल...जिंगल बेल..जिंगल ऑल द वे..’ अशी गाणी  गात देशभरात ख्रिश्चन बांधवांनी ख्रिसमस उत्साहात साजरा केला. अकोल्यातही नाताळ निमित्त मंगळवारी रात्री 10 वाजेपासून माउंट कारमेल चर्च मध्ये सामूहिक प्रार्थना सभेला सुरुवात झाली. अकोल्यातील सर्वच चर्चमध्ये भगवान येशू ख्रिस्त जन्माची भक्ती करण्यात आली. ख्रिसमस निम्मित अकोल्यातील सर्व चर्चमध्ये आकर्षक सजावट करण्यात आली आहे. 

चर्चमध्ये ख्रिस्ती बांधवांनी एकत्रित येऊन भगवान येशूसमोर प्रार्थना करत ख्रिसमसचे गीत कॅरल्सचे गायन करत प्रभू येशू यांचा जन्ममहोत्सव साजरा केला. यावेळी ख्रिस्ती बांधवांनी एकमेकांना ख्रिसमसच्या शुभेच्छा दिल्या. याव्यतिरिक्त झालेल्या कार्यक्रमांमध्ये कॅरल पार्टी, ख्रिस्त जन्माचे देखावे, उपासना, प्रार्थना अशा विविध कार्यक्रमांचीही रेलचेल होती.

प्रभू येशुंच्या प्रेम, त्याग, स्नेहाच्या विचारांचे अनुकरण करण्याची गरज - रेव्ह निलेश अघमकर                                                           

बुधवार 25 डिसेंबर रोजी संपूर्ण जगभरात प्रभू येशू ख्रिस्तांचा जन्मदिवस ख्रिसमस ( नाताळ) सण हर्षोल्हासात साजरा करण्यात आला. त्यानिमित्त अकोला शहरातील प्रमुख आठ चर्चेस आणि जिल्ह्यातील एकूण 30 चर्चेसमध्ये सकाळी प्रार्थनासभांचे आयोजन करण्यात आले होते. अकोल्यातही नाताळ सण मोठ्या हर्षोल्हासात साजरा करण्यात आला. 

ख्रिश्चन कॉलनी येथील बेथेल सेविअर्स अलायन्स चर्च मध्ये रेव्ह. निलेश अघमकर यांनी पवित्र बायबल मधील आठ व्यक्तीचा संदर्भ देत विविध वचनांच्या आधारे नाताळाचा संदेश दिला. प्रत्येक गोष्टीसाठी आणि प्रत्येक परिस्थितीत आपण सदोदित देवाची स्तुती केली पाहिजे, सध्याची जागतिक परिस्थिती पाहता प्रभू येशू यांच्या प्रेम, त्याग आणि स्नेहाच्या विचारांचे अनुकरण करण्याची गरज असल्याचे त्यांनी सांगितले. प्रभू येशू हे अखिल मानवजातीच्या उद्धारासाठी या जगात आले, त्यांनी जगाला प्रेम, शांती, स्नेह आणि त्यागाची शिकवण दिली, त्याचेच अनुकरण करण्याची गरज असल्याचे रेव्ह. अघमकर म्हणाले. 

गेल्या नोव्हेंबर महिन्यापासूनच सर्वत्र नाताळ सणाची तयारी सुरु झाली. नोव्हेंबर महिन्यात येणाऱ्या ख्रिश्चन धर्मियांच्या गृहसणापासूनच खरेतर नाताळाची तयारी सुरु होते. 

गृहसणाच्यावेळी सर्व खिश्चन कुटूंंबे आपापल्या घरांची स्वच्छता करतात. त्या काळात सर्व खिश्चन बधू भगिनी एकमेकांच्या घरी जावून प्रार्थना करतात आणि शुभेच्छा देतात. 

डिसेंबर महिना उजाडताच घरांना आणि चर्चेसना रंगरंगोटी देण्यास सुरुवात होते. पहिल्या पंधरवड्यातच नाताळासाठी कपड्यांची खरेदी, सणासाठी फराळाची तयारी सुरु होते. 20 तारखेलाच सर्व घरे आणि चर्चना रोषणाई केली जाते. त्यानंतर सलग चार दिवस घरोघरी फिरुन अबालवृद्ध ख्रिस्तजन्माची गाणी म्हणतात. त्यामध्ये सांताक्लॉजचा वेष परिधान केलेला व्यक्ती सर्व लहान मुलांच्या आकर्षणाचा केंद्रबिंदू असतो. 

24 डिसेंबरला रात्री 10 ते 12 वाजेदरम्यान सर्व चर्चमधून प्रार्थना सभांचे आयोजन केले गेले. रात्री 12 वाजता फटाके फोडून नाताळाचे जोरदार स्वागत करण्यात आले. 

आज 25 डिसेंबर रोजी सर्व चर्चमधून सकाळी 9 वाजता प्रार्थना सभांचे आयोजन करण्यात आले होते. सर्व चर्चमधील धर्मगुरूंनी खिश्चनांचा पवित्र धर्मग्रंथ बायबलमधील वचनांच्या आधारे ख्रिस्त जन्मावर संदेश दिला. यावेळी संडेस्कुलच्या लहान मुलांनी ख्रिस्त जन्मावर आधारित नाटिका, गीते, नृत्य सादर केली. तसेच तरुणसंघ आणि महिला संघाच्या सदस्यांनी ख्रिस्त जन्माची गीते सादर केली. यावेळी नवजात बालकांचे अर्पण करण्याचा विधीही आयोजित करण्यात आला होता. 

प्रार्थनासभेनंतर सर्व खिस्ती बंधू भगिनी यांनी एकमेकांना नाताळाच्या शुभेच्छा दिल्या. त्यानंतर आता सलग आठ दिवस सर्व चर्चमधून विविध कार्यक्रमांचे आयोजन करण्यात आले आहे. त्यामध्ये प्रामुख्याने लहान मुलांचे खेळ, तरुणांचे आणि प्रौढांचे खेळ, महिलांचे खेळ यासोबतच बायबल क्वीझ स्पर्धा, सहभोजन, सहल आणि सांस्कृतिक कार्यक्रम यांंचा समावेश आहे. 

अकोला शहरातील अलायन्स मिशन आणि इतर मिशनची असे एकूण 8 चर्च असून, नाताळानिमित्त त्या चर्चवर सुंदर रोषणाई करण्यात आली आहे. 31 डिसेंबरला पुन्हा रात्री क्यारोल पार्टी घरोघरी जावून नवीन वर्षाच्या स्वागताची गीते सादर करतील. 1 जानेवारीला खिश्चन समाज नवीन वर्ष हादेखील सण साजरा करतो. अशाप्रकारे आठवडाभर विविध कार्यक्रमांची रेलचेल असते.