mns-akola-agitation-education: होली क्रॉस शाळेच्या अनियमिततेच्या विरोधात मनसे आक्रमक; पॅनल चौकशीची शिक्षणाधिकारी यांच्याकडे मागणी

मनसे जिल्हाध्यक्ष पंकज साबळे, शहर संघटक अरविंद शुक्ला यांच्या नेतृत्वात निवेदन देण्यात आले.

भारतीय अलंकार न्यूज 24

नीलिमा शिंगणे जगड 

अकोला : होली क्रॉस शाळेच्या मनमानी कारभार व अनियमिततेच्या विरोधात महाराष्ट्र नवनिर्माण सेना आक्रमक झाली असून, याबाबात सविस्तर खुलासा मागण्याकरिता व होली क्रॉस शाळेवर पॅनल चौकशीच्या मागणीसाठी शिक्षणाधिकारी (माध्यमिक) यांना मनसे तर्फे आज निवेदन देण्यात आले. 

शहरातील होली क्रॉस कॉन्व्हेंट व होली क्रॉस माध्यमिक शाळेवर जिल्हा परिषद अकोला यांचे कोणतेच बंधन नसल्यासारखे वागत शाळा प्रशासन पालकांची अक्षरशः लूट करत असून, अवाजवी शैक्षणिक शुल्क, डोनेशन तथा वेगवेगळ्या मार्गाने विनापावती पैश्याची मागणी सर्रासपणे पालकांकडून करत आहे. प्रत्येक वर्गात मंजूर जागेपेक्षा अधिक मुले बसवण्यात येत आहे, अक्षरशः कोंबत आहेत अशी परिस्थिती आहे. शिकवण्यासाठी मुबलक शिक्षक वर्ग पण उपलब्ध नाही आहेत. पालकवर्गाने जाब विचारला तर त्यांनाच दमदाटी करण्यात येते. मनसे तर्फे याबाबात वारंवार तक्रारी करून सुद्धा शिक्षण अधिकारी या शाळेबाबत हेतुपरस्पर कानाडोळा करत आहेत, असा आरोप यावेळी मनसे पदाधिकारी व कार्यकर्त्यांनी केला.

          

निवेदन देताना शिक्षणाधिकारी (माध्यमिक) या उपस्थित नसल्यामुळे मनसे पदाधिकारी आक्रमक झाले होते. विस्तार अधिकारी यांनी मनसेचे निवेदन स्वीकारले. तात्काळ कारवाई झाली नाही तर मनसे उग्र आंदोलन करेल, असे जिल्हा परिषद प्रशासनाला मनसे तर्फे सूचित करण्यात आले. 

निवेदन देतांना मनसे जिल्हाध्यक्ष पंकज साबळे, शहर संघटक अरविंद शुक्ला, उपजिल्हाध्यक्ष सतीश फाले, शहर अध्यक्ष सौरभ भगत, जिल्हा सचिव ललित यावलकर, विधी विभागाचे उपाध्यक्ष ॲड. नंदकिशोर शेळके, विधी विभाग जिल्हाध्यक्ष ॲड. संतोष गोळे, राजेश पिंजरकर, रुपेश तायडे, मोहन मते, सोनू अवचार,चंदू अग्रवाल,प्रवीण मस्तुद, अभिषेक गौतम, दीपक खेतान आदी पदाधिकारी व कार्यकर्ते उपस्थित होते.