frequent-power-outages-akola: वारंवार वीज पुरवठा खंडित; त्रस्त नागरिकांनी केली रोहित्राची महाआरती, माजी महापौर मदन भरगड यांच्या नेतृत्वात अनोखे आंदोलन

भारतीय अलंकार न्यूज 24

नीलिमा शिंगणे जगड 

अकोला : वारंवार वीज पुरवठा खंडित होत असल्याने गीता नगर परिसरातील नागरिकांना प्रचंड त्रास सहन करावा लागत आहे. या भागातील विद्युत पुरवठा गौरक्षण फीडर वरून करण्यात येत होता. मात्र गौरक्षण फीडरवरून अनेक भागांना विद्युत पुरवठा होत असल्याने, कोणत्याही भागात बिघाड झाल्यास गीता नगर परिसरातील विद्युत पुरवठा बंद करण्यात येतो. त्यामुळे वाशिम बायपास फिडर वरून विद्युत पुरवठा करण्यात यावा अशी मागणी माजी महापौर मदन भरगड यांनी केली होती. त्यानंतर ठेकेदाराने विद्युत खांब बसवले मात्र केबल न टाकल्याने काम अर्धवट आहे. त्यामुळे महावितरणचे लक्ष वेधण्यासाठी माजी महापौर मदन भरगड यांनी आज सकाळी शेकडो नागरिकांसह विद्युत रोहित्राची महाआरती केली.

गौरक्षण रोड फिटर वरून कैलास टेकडी, खदान व इतर अनेक भागात विद्युत पुरवठा करण्यात येतो. त्यामुळे गौरक्षण रोड फिडरवर मोठ्या प्रमाणात ताण येत होता. त्यामुळे दररोज कोणत्यातरी भागात बिघाड होत होता. परिणामी मानव शोरूम पासून हिंगणा मंदिर गीता नगर, स्नेह नगर, पोलीस वसाहत, अकोली खुर्द,एमरॉल्ड कॉलनी, रेणुका डुप्लेक्स, रूपचंद नगर, मातोश्री नगर, हिंगणा, सोमठाणा पर्यंत विद्युत पुरवठा खंडित करण्यात येत होता. 

दररोज होणाऱ्या विजेच्या लपंडावामुळे नागरिक त्रासले होते. त्यांनी हा प्रश्न सोडविण्याची माजी महापौर मदन भरगड यांना विनंती केली. नंतर भरगड यांनी तत्कालीन पालकमंत्री बच्चू कडू यांची भेट घेऊन नागरिकांची समस्या सांगितली. बच्चू कडू यांनी विद्युत खांब टाकून वाशिम बायपास फिडर वरून वीज पुरवठा देण्यासाठी निधीची तरतूद केली. वर्क ऑर्डर काढण्यात आली. वाशिम बायपास ते कलोरे कॉम्प्युटर पर्यंत विद्युत खांब उभारण्यात आले. मात्र गेल्या दोन वर्षापासून केबल न टाकल्याने काम अर्धवटच होते. त्यामुळे विद्युत पुरवठा गौरक्षण फिडरवरून होत होता व दररोज नागरिकांना त्रास सहन करावा लागत होता. अखेर सहनशीलता संपल्याने मदन भरगड यांच्या नेतृत्वात आज गीता नगर परिसरात रोहित्राची   महाआरती करण्यात आली. या अनोख्या आंदोलनाने वारंवार खंडित होणाऱ्या विविध पुरवठ्याची समस्या पुन्हा एकदा ऐरणीवर आली आहे. 

महाआरतीला राजेद्र चितलागे, गणेश कटारे, रघुनाथ खडसे, अभिषेक भरगड, गणेश कलसकर, रमेश जैन, सागर सरकटे, सुरेश कलोरे , वसंत तिवारी, अशोक अपुर्वा, अमित शर्मा, मनोजित बागरेचा, सुशील बागरेचा , अमीत बागरेचा, कमल गट्टाणी, बालू पाटील, मुकेश अग्रवाल, अमोल यादव चन्दकातं अवतनकर, दुर्गैश ठाकुर, कुदंन ठाकुर, रितीक डोगंरे, संदीप कलोरे, शुभम अबूलकर, प्रमोद अठराळे, अमोल तिहिले, मसाराम कोरडे , प्रकाश गवई, श्रीकांत उसने , प्रमोद वेरूलकर, विनोद मराठे यांची उपस्थिती होती.