crime-news-court-verdict-patur: पातुर पोक्सो प्रकरणात आरोपीला 2 वर्षांची सश्रम कारावासाची शिक्षा; विनयभंग आणि पाठलाग प्रकरणात न्यायालयाचा कठोर निर्णय

अकोला: पातुर पोक्सो प्रकरणात आरोपीला २ वर्षांची सश्रम कारावासाची शिक्षा; विनयभंग प्रकरणात न्यायालयाचा कठोर निर्णय

अकोला जिल्ह्यातील पातुर येथील पोक्सो आणि विनयभंग प्रकरणात आरोपीला २ वर्षांची सश्रम कारावासाची शिक्षा व ४ हजार रुपयांचा दंड. अकोला जिल्हा व सत्र न्यायालयाचा महत्त्वपूर्ण निकाल.

ठळक मुद्दा 

ट्युशनहून घरी येणाऱ्या अल्पवयीन मुलीचा पाठलाग, अश्लील हातवारे आणि विनयभंग; आरोपीला दंडासह शिक्षा

भारतीय अलंकार न्यूज 24

नीलिमा शिंगणे जगड 

अकोला | ५ ऑगस्ट २०२६ : पातुर पोलीस ठाण्याच्या हद्दीतील अल्पवयीन मुलीचा पाठलाग करून तिचा विनयभंग केल्याप्रकरणी अकोला जिल्हा व सत्र न्यायालयाने आरोपीला २ वर्षांची सश्रम कारावासाची शिक्षा तसेच एकूण ४ हजार रुपयांचा दंड सुनावला आहे. या निकालामुळे महिलांवरील आणि अल्पवयीन मुलींवरील अत्याचाराच्या प्रकरणांमध्ये कठोर कारवाईचा संदेश गेला आहे.

आरोपी सैयद इरशाद सैयद तैसर (वय २५, रा. मोमिनपुरा, पातुर, जि. अकोला) याच्याविरुद्ध दाखल गुन्ह्यात दोष सिद्ध झाल्यानंतर जिल्हा व सत्र न्यायाधीश, अकोला यांनी हा निकाल दिला.

घटना काय होती?

फिर्यादीच्या अल्पवयीन मुलीने आपल्या वडिलांना सांगितले की, गेल्या चार ते पाच दिवसांपासून आरोपी तिचा शाळेत व ट्युशनला जाताना पाठलाग करत होता. तो हातवारे, असभ्य संभाषण करत होता तसेच कोणाला सांगितल्यास जीवे मारण्याची धमकी देत होता.

घटनेच्या दिवशी सकाळी साडेदहा वाजताच्या सुमारास ट्युशनहून सायकलने घरी येत असताना टी.के.व्ही. चौकात आरोपीने तिचा हात पकडून "आय लव्ह यू" म्हणत विनयभंग केला. यानंतर पीडितेच्या वडिलांनी पातुर पोलीस ठाण्यात तक्रार दाखल केली.

तपास आणि न्यायालयीन प्रक्रिया

या प्रकरणी अपराध क्र. ३३३/२०२४ अंतर्गत भारतीय दंड संहितेच्या कलम ३५४, ३५४(ड), ५०६, ५०९ तसेच पोक्सो कायद्याच्या कलम ८ व १२ अन्वये गुन्हा दाखल करण्यात आला.

तपास अधिकारी सपोनि. गजानन तडसे यांनी तपास पूर्ण करून न्यायालयात दोषारोपपत्र दाखल केले. सरकार पक्षातर्फे विशेष सरकारी वकील श्याम खोटरे यांनी प्रभावी युक्तिवाद केला.

न्यायालयाने सुनावलेली शिक्षा

• कलम ३५४ भादंवि. – २ वर्षे सश्रम कारावास व ₹१,००० दंड

• कलम ५०९ भादंवि. – १ वर्ष कारावास व ₹१,००० दंड

• कलम १२ पोक्सो कायदा – २ वर्षे सश्रम कारावास व ₹२,००० दंड

अधिकाऱ्यांचे मार्गदर्शन

या प्रकरणाचा पाठपुरावा पोलीस अधीक्षक अर्चित चांडक, अपर पोलीस अधीक्षक बी. चंद्रकांत रेड्डी, उपविभागीय पोलीस अधिकारी गजानन पडघन, पोलीस निरीक्षक रामकृष्ण जाधव यांच्या मार्गदर्शनाखाली करण्यात आला. पैरवी अधिकारी पोहेकॉ वासुदेव मात्रे तसेच सफौ अनवर खान (सीएमएस सेल, अकोला) यांनी न्यायालयीन कामकाजात पाठपुरावा केला.

ठळक मुद्दे

• पातुर येथील पोक्सो व विनयभंग प्रकरणात आरोपी दोषी.

• अकोला जिल्हा व सत्र न्यायालयाचा महत्त्वपूर्ण निकाल.

• आरोपीला २ वर्षांची सश्रम कारावासाची शिक्षा.

• एकूण ₹४,००० दंडाची शिक्षा.

• अल्पवयीन मुलीचा पाठलाग, धमकी आणि विनयभंग केल्याचा गुन्हा सिद्ध.