amc-budget-2026-politics-akl: अकोला मनपा अर्थसंकल्पीय सभेत गोंधळ; १६ नगरसेवक निलंबित, पोलीस बंदोबस्तात सभा पूर्ण!

लक्षवेधी मुद्दा
₹१,५०० कोटींच्या बजेटवर चर्चा अपेक्षित असताना घोषणाबाजी, ठिय्या आंदोलन आणि राजकारणामुळे विकासाचे मुद्दे राहिले बाजूला

ठळक मुद्दे :

• अकोला मनपा अर्थसंकल्पीय सभेत अभूतपूर्व गोंधळ

• ‘पन्नास खोके, एकदम ओक्के’ घोषणांमुळे वातावरण तापले

• १६ विरोधी नगरसेवकांचे तीन सभांसाठी निलंबन

• पोलिस बंदोबस्तात नगरसेवकांना सभागृहाबाहेर काढले

• ₹१,५०० कोटींच्या बजेटवर अपेक्षित चर्चा झाली नाही

• पत्रकारांनाही सुरुवातीला प्रवेश नाकारल्याने ठिय्या आंदोलन

भारतीय अलंकार न्यूज 24

नीलिमा शिंगणे जगड 

अकोला महानगरपालिकेच्या विशेष अर्थसंकल्पीय सभेत सोमवारी (३० मार्च) मोठा गोंधळ पाहायला मिळाला. शहराच्या विकासाचा रोडमॅप ठरणाऱ्या या महत्त्वाच्या सभेत ₹१,५०० कोटींच्या अंदाजपत्रकावर सखोल चर्चा अपेक्षित होती. मात्र, घोषणाबाजी आणि राजकीय वादामुळे संपूर्ण सभेचे वातावरणच बिघडले.

सभेच्या सुरुवातीला स्थायी समिती सभापती विजय अग्रवाल यांनी २०२६-२७ या आर्थिक वर्षाचे अंदाजपत्रक महापौर शारदा खेडकर यांच्याकडे सादर केले. त्यानंतर चर्चा सुरू होताच वंचित बहुजन आघाडीचे नगरसेवक सुनील इन्नानी बोलण्यासाठी उभे राहिले. यावेळी सत्ताधारी नगरसेवकांकडून “पन्नास खोके, एकदम ओक्के” अशा घोषणा देण्यात आल्या.

या घोषणांमुळे विरोधक आक्रमक झाले आणि सभागृहात जोरदार गदारोळ सुरू झाला. विरोधी पक्षनेते डॉ. झीशान हुसेन यांच्यासह अनेक नगरसेवकांनी घोषणांवर आक्षेप घेत माफीची मागणी केली. मात्र सत्ताधाऱ्यांनीही आक्रमक भूमिका घेतल्याने वातावरण आणखी चिघळले.

विरोधकांनी सभागृहात ठिय्या आंदोलन सुरू केले. यामुळे काही काळ कामकाज पूर्णपणे ठप्प झाले. परिस्थिती नियंत्रणाबाहेर जात असल्याने महापौरांनी पोलिसांना बोलावले. पोलिसांच्या उपस्थितीत विरोधी नगरसेवकांना सभागृहाबाहेर काढण्यात आले.

यानंतर सभागृहाची शिस्त भंग केल्याच्या कारणावरून १६ विरोधी नगरसेवकांना पुढील तीन सभांसाठी निलंबित करण्यात आले. या निर्णयाचा विरोधकांनी तीव्र निषेध केला आणि तो लोकशाहीविरोधी असल्याचा आरोप केला.

दरम्यान, या सर्व गोंधळात शहरातील महत्त्वाचे मुद्दे — रस्ते दुरुस्ती, पाणीटंचाई, कचरा व्यवस्थापन, आरोग्य सुविधा, पथदिवे — यावर अपेक्षित चर्चा होऊ शकली नाही. त्यामुळे नागरिकांमध्ये नाराजी व्यक्त होत आहे.

याच वेळी पत्रकारांना सभागृहात प्रवेश नाकारण्यात आल्याने त्यांनीही महापौरांच्या कक्षासमोर ठिय्या आंदोलन केले. नंतर प्रशासनाने एका प्रतिनिधीला पुढील सभांमध्ये कॅमेऱ्यासह प्रवेश देण्याचे आश्वासन दिल्यानंतर आंदोलन मागे घेण्यात आले.

महत्त्वाच्या प्रतिक्रिया :

महापौर शारदा खेडकर :
सभागृहाची शिस्त राखण्यासाठी वारंवार आवाहन करूनही विरोधकांनी गोंधळ घातला. त्यामुळे १६ नगरसेवकांचे निलंबन करण्यात आले.

विरोधी पक्षनेते डॉ. झीशान हुसेन :
आम्ही जनतेच्या प्रश्नांवर बोलत होतो. सत्ताधाऱ्यांनी घोषणाबाजी करून मुद्दाम गोंधळ घातला व निलंबन करून लोकशाही दडपण्याचा प्रयत्न केला.

निष्कर्ष !

अकोल्याच्या विकासासाठी महत्त्वाची असलेली अर्थसंकल्पीय सभा राजकारणाच्या रंगात रंगली. यामुळे शहराच्या मूलभूत समस्यांवर चर्चा न होता गोंधळातच सभा संपली, हे नागरिकांसाठी चिंतेचे कारण ठरत आहे.

निलंबित नगरसेवक यादी

अकोला महानगरपालिका, अकोला

नगर सचिव कार्यालय

विशेष सर्वसाधारण सभा दि. 30/03/2026 रोजी सकाळी 11.00 वाजता आयोजित सभे मध्ये नगर सेवक / नगर सेविका यांना पुढील 3 सभे करिता निलंबीत करण्यात आले आहे. त्यांची यादी खालील प्रमाणे आहे.

1. मोहम्मद फजलु अब्दुल करीम, प्रभाग १ ड

2. आझादखान अलियारखान, प्रभाग 17 ड

3. गवई पराग रामकृष्ण, प्रभाग 14 क

4. देव निलेश रामकृष्ण, प्रभाग 3 ड

5. शेख शमशु कमर शेख साबीर,

6. डॉ. जिशान हुसैन, प्रभाग 11 ड

7. विजय रामदास इंगळे, प्रभाग 20 अ

8. लंगोटे शंकर भाऊराव, स्विकृत सदस्य

9. निलोफरखान सोहेलखान, प्रभाग 1 क

10. आकाश श्रीकृष्ण कवडे, स्विकृत सदस्य

11. अभय अशोक खुमकर, प्रभाग 4 ड

12. जैनबबी शेख इब्राहिम, प्रभाग 11 अ

13. अशिया परवीन मोहम्मंद शारिक, प्रभाग 18 क

14. पातोडे उज्वला प्रविण, प्रभाग 14 अ

15. सुवर्णरेखा विजय जाधव, प्रभाग 7 अ

16. बहादुरकर जयश्री महेंद्र, प्रभाग 14 ब