mayor-reservation-mahpalika: राज्यातील 29 महानगरपालिकेतील महापौरपदासाठी आरक्षण जाहीर; अकोल्यात ओबीसी महिला होणार महापौर

Maharashtra Municipal Corporation Reservation 2026

भारतीय अलंकार न्यूज 24

नीलिमा शिंगणे जगड 

अकोला: महाराष्ट्रात २९ महानगरपालिकाच्या निवडणुक पार पडल्या. या निवडणुकमध्ये भाजपा सर्वात मोठा पक्ष ठरला. मात्र काही महानगरपालिकांमध्ये भाजपाला स्पष्ट बहुमत न मिळाल्याने त्यांना सत्ता मिळविण्यासाठी तजवीज करावी लागत आहे. तर दुसरीकडे राज्यात सत्तेत एकत्र असणाऱ्या पक्षांना स्थानिक पातळीवर आपल्याच मित्रपक्षाविरोधात उभं राहण्याची वेळ ओढवली. तर विरोधी राजकीय पक्ष आणि अपक्ष देखील सत्तेच्या खेळात सामील झाले आहे. एकूणच सत्तास्थापनेसाठी सर्वच महानगरपालिकांमध्ये राजकीय खेळी सुरू असताना, आज महापौरपदाची आरक्षण सोडत जाहीर झाल्याने नवे डाव आखणे सुरू झालं आहे. यासर्व खेळात कोण बाजी मारतो, हे लवकरच पाहायला मिळेल. 

दरम्यान आज सकाळी महाराष्ट्र राज्यातील 29 महानगरपालिकेतील महापौरपदासाठी नगरविकास राज्यमंत्री माधुरी मिसाळ यांच्या उपस्थितीत आरक्षण सोडत जाहीर करण्यात आली. 29 महापालिका सोडतीसाठी भाजपकडून महामंत्री राजेश शिरवडकर, ठाकरे गटाकडून मुंबई महानगरपालिकेच्या माजी महापौर किशोरी पेडणेकर, आमदार मनोज जामसुतकर, तर राष्ट्रवादी काँग्रेसकडून अजित पवार गटाकडून आनंद परांजपे उपस्थित होते.

50 टक्के महिला आरक्षणाचे नियम लागू केल्याने राज्यातील 15 महापालिकांवर महिला राज असणार आहे. तर 14 ठिकाणी सर्वसाधारण वर्गाला संधी मिळणार आहे. महिलांना असलेल्या 50 टक्के आरक्षणानुसार, 4 महापालिकांमध्ये ओबीसी महिला, तर 9 महापालिकांमध्ये खुल्या प्रवर्गातील महिलांसाठी आरक्षण लागू होणार आहे. राज्यातील 29 महानगरपालिकेसाठी 15 जानेवारीला मतदान झालं होतं. तर 16 जानेवारीला मतमोजणी झाली होती. कोणत्या महापालिकेत कोणत्या प्रवर्गासाठी आरक्षण जाहीर करण्यात आलं आहे, याबाबतची संपूर्ण माहिती पुढील प्रमाणे आहे.

महाराष्ट्रातील 29 महापालिका महापौर आरक्षण सोडत जाहीर

 

1. छत्रपती संभाजीनगर:  सर्वसाधारण  (महिला)

2. नवी मुंबई:  सर्व साधारण

3. वसई- विरार: सर्वसाधारण

4. कल्याण- डोंबिवली: अनुसूचित जमाती

5. कोल्हापूर: ओबीसी

6. नागपूर:  सर्वसाधारण

7. बृहन्मुंबई:  सर्वसाधारण

8. सोलापूर:  सर्वसाधारण

9. अमरावती:   सर्वसाधारण (महिला)

10. अकोला: ओबीसी  (महिला)

11. नाशिक:  सर्वसाधारण

12. पिंपरी- चिंचवड:  सर्वसाधारण

13. पुणे:  सर्वसाधारण

14. उल्हासनगर: ओबीसी

15. ठाणे: अनुसूचित जाती

16. चंद्रपूर:  ओबीसी (महिला)

17. परभणी: सर्वसाधारण

18. लातूर: अनुसूचित जाती (महिला )

19. भिवंडी- निजामपूर: सर्वसाधारण

20. मालेगाव: सर्वसाधारण

21. पनवेल:  ओबीसी

22. मीरा- भाईंदर:  सर्वसाधारण

23. नांदेड- वाघाळा: सर्वसाधारण

24. सांगली- मिरज- कुपवाड:  सर्वसाधारण

25. जळगाव: ओबीसी (महिला)

26. अहिल्यानगर: ओबीसी (महिला)

27. धुळे: सर्वसाधारण  (महिला)

28. जालना: अनसूचित जाती (महिला)

29. इचलकरंजी:  ओबीसी