raman-chandak-murder-case: व्यावसायिक रमण चांडक यांची हत्या; संशयित आरोपी ताब्यात; अकोला शहर व अकोट मध्ये खळबळ

भारतीय अलंकार न्यूज 24

नीलिमा शिंगणे जगड 

Akola news: अकोला शहरातील गीता नगर भागातील रहिवासी व व्यावसायिक रमण रामचंद्र चांडक यांचा आज मंगळवार 8 एप्रिल रोजी सकाळी अकोट तालुक्यातील पोपटखेड मार्गावरील बंद पडलेल्या एका कारखान्याच्या इमारतीत मृतदेह आढळल्याने अकोला जिल्ह्यात खळबळ उडाली आहे. पोलिसांनी हा खून असल्याची शक्यता व्यक्त करीत आतापर्यंत एका संशयित आरोपीस ताब्यात घेतले आहे. 

चांडक यांनी अलीकडेच शेत जमीन व रियल इस्टेट व्यवसाय सुरू केला होता. या हत्येमागे शेतजमीनीचा ताबा किंवा आर्थिक देवाणघेवाणचा उद्देश असावा, असा प्राथमिक अंदाज लावला जात  आहे. मात्र तपासाअंती निश्चितच हत्येमागील घबाड उघडकीस आल्या शिवाय राहणार नाही.

सातपुडा पर्वतरांगांच्या कुशीत असलेल्या अकोट पोपटखेड मार्गावर एका शेतशिवारालगत जनावरांच्या हाडावर प्रक्रिया करणाऱ्या बंद अवस्थेतील कारखान्याच्या इमारतीमध्ये आज सकाळी लोकांना मृतदेह आढळून आल्याने परिसरात खळबळ उडाली होती. या व्यक्तीची आत्महत्या की खून अशी चर्चा परिसरात सुरू होती. लोकांनी घटनेची माहिती पोलिसांना दिली.

अकोट ग्रामीण पोलिसांनी घटनास्थळी लगेच धाव घेतली. मृतदेहाजवळ पोलिसांना दोन मोबाईल आढळले. मृत व्यक्तीच्या अंगावरील कपड्यांची तपासणी केली असता, हा मृतदेह अकोट तालुक्यातील पणज येथील निवासी आणि सद्यस्थितीत अकोला येथील गीता नगर भागात वास्तव्यास असलेले रमण चांडक यांचा असल्याची समजले.पोलिसांनी घटनास्थळ पंचनामा करून ठाणेदार किशोर जुनघरे यांच्या नेतृत्वात पुढील तपास सुरू केला. 

मोठ्या आर्थिक देवाण घेवाणीतून हा दुर्दैवी प्रकार घडल्याची शक्यता वर्तविल्या जात असून संशयाच्या आधारावर पोलिसांनी एका व्यक्तीला ताब्यात घेतल्याची सूत्रांची माहिती आहे. मृतदेहाची उत्तरीय तपासणी अकोट ग्रामीण रुग्णालयात करुन शवविच्छेदन करण्यात आले आहे.

अकोट तालुक्यातील पणज या गावाचे मुळ रहिवासी रमण चांडक हे गती इन्शुरन्स आणि फायनान्शियल सर्व्हिसेसचे संस्थापकीय संचालक असून काही वर्षांपासून ते अकोला शहरात वास्तव्यास आहेत. अलिकडच्या काळात त्यांनी पोपटखेड भागात शेतजमीन सह रियल इस्टेट मध्ये कामकाज सुरू केले असल्याची माहिती आहे.