unseasonal-rains-in-akola-dist: अकोल्यात अवकाळी पावसाची हजेरी; शेतकरी हवालदिल, शहरात नागरिकांची धांदल

ठळक मुद्दे

27-28 डिसेंबर दरम्यान राज्यात गारपीट आणि मेघगर्जनेसह पावसाचा अंदाज

खानदेश, मध्य महाराष्ट्र, मराठवाडा आणि विदर्भातील शेतकऱ्यांनी हवामानाच्या अंदाजाची दखल घेऊन शेतीचे नियोजन करावे

भारतीय अलंकार न्यूज 24

नीलिमा शिंगणे जगड 

अकोला: भारतीय हवामान विभागाच्या नागपूर कार्यालयातर्फे प्राप्त संदेशानुसार, जिल्ह्यात  27 व 28 डिसेंबर रोजी वादळ, अवकाळी पाऊस, गारपीट होण्याची शक्यता वर्तविण्यात आली होती. बी ए न्यूज हा अंदाज खरा ठरत आज पहाटे पासून अकोला जिल्हयात अवकाळी पावसाने हजेरी लावली आहे. शेतातील उभे पीक खराब झाल्याने शेतकरी हवालदिल झाल्याचे ग्रामीण भागात चित्र आहे. तर शहरी भागात नागरिकांची धांदल उडाली.

अवकाळी पावसाने शेतक-यांचे शेतमालाचे मोठया प्रमाणात नुकसान  झाले आहे. हरबरा, गहू, सोयाबीन, भाजीपाला पिकाचे नुकसान झाले आहे. बाजार समितीत विक्रीला आणलेला शेतमालही खराब झाला. 

27-28 डिसेंबरदरम्यान मध्य महाराष्ट्र, मराठवाडा आणि विदर्भात गारपीट आणि मेघगर्जनेसह पावसाचा अंदाज वर्तविण्यात आला होता. 27 डिसेंबरला दुपारपासून मेघगर्जनेसह पावसाची सुरुवात सर्वात प्रथम नंदुरबार, धुळे, जळगाव, अहिल्यानगर जिल्ह्यांसह, दक्षिण मराठवाडा, पुणे आणि नाशिक जिल्ह्यांतील पूर्व भागांमध्ये होईल. शुक्रवार रात्रीपर्यंत वादळी पाऊस पश्चिम विदर्भ आणि शेजारच्या मराठवाड्यात हजेरी लावेल, ज्यात बुलढाणा, अकोला, वाशीम, अमरावती, छत्रपती संभाजीनगर, जालना, परभणी, हिंगोली आणि बीड जिल्ह्यांचा समावेश आहे. या भागांमध्ये काही प्रमाणात गारपिटीची शक्यता देखील वर्तविण्यात आली होती. मध्य महाराष्ट्र आणि मराठवाड्याच्या उर्वरित जिल्ह्यांतील काही भागांमध्ये मेघगर्जनेसह पाऊस पडण्याची शक्यता देखील वर्तविण्यात आली होती. 

उद्या सुध्दा पाऊस !

28 डिसेंबरच्या पहाटेपर्यंत वादळी पाऊस पूर्वेकडे सरकेल आणि विदर्भातील इतर जिल्ह्यांत हजेरी लावेल. यात यवतमाळ, वर्धा, नागपूर, भंडारा, गोंदिया, आणि चंद्रपूर जिल्ह्यांचा समावेश आहे. या भागांमध्ये काही प्रमाणात गारपीट होण्याची शक्यता आहे. पश्चिम विदर्भ आणि शेजारच्या मराठवाड्यातील काही भागांमध्ये पावसाची स्थिती या दिवशी देखील कायम राहण्याची शक्यता आहे. या दिवशी एकंदरीत विदर्भात आणि मराठवाड्यात आभाळी हवामान अपेक्षित असल्यामुळे कमाल तापमानात थोडी घट होईल. मात्र खानदेश आणि मध्य महाराष्ट्रात हवामान स्थिर होण्यास सुरुवात होईल. 

30 डिसेंबरपासून थंडीत वाढ  

29 डिसेंबरला विदर्भ आणि मराठवाड्यातील काही तुरळक ठिकाण वगळता राज्यातील बहुतांश भागांत स्थिर हवामान पहिला मिळेल, आणि 30 डिसेंबरपासून थंडीत वाढ होईल. 

सकाळी नागरिकांची धांदल 

दरम्यान आज पहाटे पासून जोरदार पाऊस सुरू असल्याने अकोला शहरात  शाळा, ऑफिसला जाणाऱ्यांची धांधल उडाली. पावसामुळे विजेचा लपंडावही सुरू झाला. बी ए न्यूज. रस्त्यावर पाणी साचल्याने वाहतुकीस अडचण निर्माण झाली आहे. तर नागरिकांनी कपाटात ठेवलेली रेनकोट छत्री परत बाहेर काढल्या आहेत.

जिल्हा प्रशासनाचे आवाहन 

शेतकऱ्यांनी प्राण्यांना आणि काढणी केलेल्या पिकांना पाऊस, गारपीट आणि वाऱ्यापासून सुरक्षित ठेवावे. 

वादळ आल्यास झाडांखाली, मोकळ्या जागेत, टिनाच्या शेडखाली, वीजप्रवाह असलेल्या तारांखाली किंवा विद्युत रोहित्रांनजीक आसरा घेऊ नये.

मोबाइल फोन बंद ठेवावा. 

नदी काठच्या नागरिकांनी सतर्क राहावे.