strike-medical-professionals: वैद्यकीय व्यवसायिकांचा उद्या देशव्यापी बंद; अकोला आयएमएचा सहभाग, 24 तास ॲलोपॅथी सेवा बंद, फक्त अत्यावशक सेवा सुरू राहणार

   file images 

भारतीय अलंकार न्यूज 24

नीलिमा शिंगणे जगड 

अकोला: 9 ऑगस्ट 2024 च्या पहाटे कोलकाता येथील आर जी कार मेडिकल कॉलेजमध्ये पदव्युत्तर पदवीधर तरुणीवर क्रूरपणे बलात्कार करून तिची अमानुषपणे हत्या करण्यात आली. यामुळे फक्त वैद्यकीय क्षेत्रालाच नव्हे तर संपूर्ण देशाला मोठा धक्का बसला आहे. यामुळे डॉक्टर्स च्या कामाच्या ठिकाणच्या सुरक्षेचा अतिमहत्वाचा प्रश्न पुन्हा ऐरणीवर आला आहे. तेव्हापासून आपल्या फार पूर्वीपासून प्रलंबित सुरक्षेसंदर्भातील न्याय मागण्यासाठी निवासी डॉक्टर्स देशव्यापी संपावर गेले आहेत. 

आयएमए तर्फेही देशभरात निदर्शने आणि कँडल मार्च काढण्यात आले आहेत. आर जी कार महाविद्यालतील अधिकाऱ्यांनी गुन्ह्याची परिस्थिती अतिशय हलगर्जीपणे, निष्काळजीपणे हाताळली आणि पहिल्या दिवसानंतर तर पोलिस तपासही जाणिवपूर्वक रखडवला गेला जेणेकरून या प्रकरणातील हाय प्रोफाईल गुन्हेगार सुटतील. मात्र अखेर 13 ऑगस्ट 2024 रोजी, कोलकाता उच्च न्यायालयाने राज्य पोलिसांना आतापर्यंतच्या तपासावर असमाधान व्यक्त करून हे प्रकरण केंद्रीय अन्वेषण ब्युरो (CBI) कडे सोपविण्यास सांगितले आहे. राज्य पोलिसांनी त्यांचा तपास सुरू ठेवल्यास पुरावे नष्ट होण्याची शक्यताही त्यांनी वर्तवली. 

पंधरा ऑगस्टला आपल्या स्वातंत्र्यदिनी जेव्हा आपण सर्व देशवासी आनंद साजरा करीत होतो त्याच दिवशी मोठ्या जमावाने या रुग्णालयाच्या विविध विभागांची फक्त तोडफोडच नाही केली तर ज्या सेमिनार रुममध्ये पिडीत निवासी डॉक्टर चा निर्घृण बलात्कार व हत्या केली गेली तेथले पुरावेही नष्ट करण्याचा प्रयत्न ह्या जमावाने केला. एवढ्यावरच ते थांबले नाहीत तर त्यांनी आंदोलन करणाऱ्या वैद्यकीय विद्यार्थ्यांवरही हल्ला केला. एवढे अपुरे होते की काय भरती असलेल्या रूग्णांना तसेच भरती रूग्णांसाठी लागणाऱ्या साधनसामग्री ला सुध्दा प्रचंड मोठी क्षती पोहोचविली. 

डॉक्टर्स विशेषत: स्त्री डॉक्टर्स हिंसाचाराला वारंवार बळी पडतात. रुग्णालये आणि कॅम्पसमध्ये डॉक्टरांच्या सुरक्षेची तरतूद करणे हे अधिकाऱ्यांचे काम आहे. मात्र डॉक्टर्स च्या सुरक्षेबाबत संबंधित ह्या अधिकाऱ्यांच्या उदासीनता आणि असंवेदनशीलतेमुळेच डॉक्टर्स, परिचारिका आणि इतर आरोग्यसेवा कर्मचाऱ्यांवर वारंवार शारीरिक हल्ले होतात, रूग्णालयामध्ये राडे होत राहतात. 

कोलकाता येथील आर जी कार मेडिकल कॉलेजमधील स्री निवासी डॉक्टर वर झालेल्या क्रूर गुन्हेगारी आणि स्वातंत्र्यदिनाच्या पूर्वसंध्येला आंदोलक विद्यार्थ्यांवर उधळलेल्या गुंडगिरीच्या पार्श्वभूमीवर, इंडियन मेडिकल असोसिएशनने शनिवारी 17 ऑगस्ट 2024 निषेध दिन पाळून  सकाळी 6 वाजेपासून ते रविवार 18 ऑगस्ट 2024 सकाळी 6 वाजेपर्यंत 24 तासांसाठी आधुनिक वैद्यकशास्त्राच्या डॉक्टरांच्या (ॲलोपॅथी) देशव्यापी सेवा बंद ठेवण्याची घोषणा केली आहे.  

अत्यावश्यक सेवा मात्र सुरू राहतील 

यामध्ये सर्व अत्यावश्यक सेवा मात्र सुरू ठेवल्या जातील. अपघातग्रस्तांना आकस्मिक सेवा दिली जाईल. परंतु नियमित ओपीडी कार्य करणार नाहीत आणि वैकल्पिक, तातडीच्या नसलेल्या शस्त्रक्रियाही केल्या जाणार नाहीत. ज्या ठिकाणी आधुनिक वैद्यक डॉक्टर्स सेवा देत आहेत, त्या सर्व क्षेत्रांमधील सेवा 24 तासांसाठी बंद राहतील, अशी माहिती इंडियन मेडिकल असोसिएशन अकोला शाखेच्या वतीने अध्यक्ष डॉ. राजेन्द्र सोनोने यांनी दिली आहे.

मूक निषेध मोर्चा

या घटनेच्या निषेधार्थ आय‌एम‌ए, इंडियन डेंटल असोसिएशन, राष्ट्रीय इंटिग्रेटेड मेडिकल असोसिएशन, जनरल प्रॅक्टिशनर असोसिएशन, महाराष्ट्र राज्य मेडिकल रिप्रेझेन्टेटिव्ह असोसिएशन, महाराष्ट्र रेसिडेंट डॉक्टर्स असोसिएशन या संघटना एकत्रितरित्या 17 ऑगस्ट रोजी आय‌एम‌ए कॅम्पस, अकोला येथुन सकाळी  9 वाजता मूक निषेध मोर्चा काढणार आहेत.    

                                                        

निषेध मोर्चाचा मार्ग

आय‌एम‌ए हॉल - सिव्हिल लाइन्स चौक - रतनलाल प्लॉट चौक - दुर्गा चौक - अग्रसेन चौक - टॉवर चौक - रतनलाल प्लॉट चौक - सिव्हिल लाइन्स चौक - आय‌एम‌ए हॉल.

या मोर्चाला समारोपप्रसंगी सहभागी होणाऱ्या विविध संघटनांचे पदाधिकारी संबोधित करतील.अकोला जिल्हा फिजीओथेरपिस्ट असोसिएशन सुध्दा यात सामिल होणार आहे.