OBC Reservation: तर मतपेटीतून आरक्षणचा हिसका दाखवा -प्रकाश शेंडगे

अकोला: राज्यात न्यायालयाच्या आदेशानुसार ओबीसींचे राजकीय आरक्षण संपुष्टात आले आहे. अश्यात सर्वांगाने श्रीमंत असलेला मराठा समाज आरक्षण साठी रस्त्यावर उतरून न्यायालयातही गेला होता. मात्र, न्यायालयाने त्यांना आरक्षण नाकारले असताना मराठा समाज कलम 338 ब आणि 342 अ नुसार आरक्षणाची मागणी करीत आहे. ही मागणी ओबीसी आरक्षणावर अतिक्रमण असून सरकारने मंजूर करू नये. अन्यथा ओबीसी रस्त्यावर उतरून आंदोलन करणार आहे. अश्याही परिस्थितीत सरकारने ओबीसींचा विचार केला नाही तर त्यांना घटनाकार डॉ. बाबासाहेब आंबेडकरांनी दिलेल्या घटनादत्त अधिकाराचा वापर करून मतपेटीतून त्यांना हिसका दाखवावा, असे आवाहन ओबीसी जनमोर्चाचे प्रदेशाध्यक्ष आ प्रकाश शेंगडे यांनी शुक्रवारी केले. 

अकोल्यात ओबीसींच्या न्यायहक्का साठी चिंतन बैठक झाली. यावेळी निमंत्रित पत्रकार परिषदेत ते बोलत होते.

ओबीसींचे आरक्षण कायम राहावे, ओबीसींची स्वतंत्र जनगणना करावी, असा ठराव नाना पटोले हे विधानसभेचे अध्यक्ष असताना घेतला होता. या ठरावाची अंमलबजावणी करावी, ओबीसी अनुशेष  पूर्ण करीत भरती प्रक्रिया पूर्ण करावी, राज्य अधिवेशनात एक दिवस आणखी वाढवावा आणि ओबीसी प्रश्नांवर सविस्तर चर्चा करून ठराव पारित करावा. 338 ब, 342 अ कलम नुसार मराठ्यांचा ओबीसी मध्ये समावेश करू नये, असे ठराव पारित करण्यात आले. यासंदर्भात जनजागृती करण्यासाठी राज्यभर दौरे करणे सुरू असल्याचेही शेंडगे यांनी सांगितले.  

जर ओबीसी एकत्र झाला तर महाराष्ट्र राज्य मध्ये मुख्यमंत्रीसह सर्व मंत्री ओबीसी होतील. तसेच गावागावात संघटना उभी करण्यात येईल आणि अखेर ओबीसी आरक्षणासाठी रस्त्यावर उतरले पाहिजे, असे देखील शेंडगे म्हणाले.

यावेळी डॉ. डी. एम. भांडे, अनिल शिंदे , माजी आमदार हरीदास भदे, माजी आमदार बळीराम सिरस्कार, जयंत मसने, संतोष हुशे, चंदू सावजी, प्रकाश तायडे यांची प्रमुख उपस्थिती होती.