Akola Police: शहर वाहतूक पोलिसांनी दिला संवेदनशीलतेचा परिचय; हरवलेला महागडा मोबाईल केला परत

भारतीय अलंकार 24

अकोला: शहर वाहतूक पोलीस आपल्या संवेदनशीलतेचा परिचय देत असतांना दिसतात. सर्वसामान्य नागरिक, ऑटो चालक  यांच्यासाठी सर्वसमावेशक असे वेगवेगळे उपक्रम राबवित असतानाच नागरिकांचे रस्त्यावर पडलेली पैशाची पाकिटे, मोबाईल व महत्वाची कागदपत्रे बऱ्याच वेळेस शोध घेऊन परत सुद्धा केली आहेत. असाच एक प्रसंग आज २४ मार्च रोजी सकाळी अग्रसेन चौकात कर्तव्य बजावत असलेले शहर वाहतूक शाखेचे पोलीस अंमलदार राजेश दुबे यांचे बाबतीत घडला. 

दुबे यांना चौकात एक महागडा अँड्रॉइड मोबाईल पडलेला दिसला. सुदैवाने तो लॉक नव्हता त्यांनी त्याची पाहणी केली असता, त्यांना मोबाईल मालकाचा स्क्रीनवर फोटो दिसला. त्यांनी त्यातील एका फोन क्रमांकावर फोन करून त्यांचे मित्राला माहिती दिली. तसेच त्याच फोन वर एका पंजाब राज्यातील इसमाचा फोन आला. या दोन्ही फोन वरून हा मोबाईल फोन हा गिरीश राठी (रा. राधाकिसन प्लॉट अकोला) यांचा असल्याचे निष्पन्न झाले.

गिरीश राठी यांना निरोप देवून फोन घेण्यासाठी अग्रसेन चौकात पाठवण्यास सांगितले. थोड्याच वेळात गिरीश राठी हे अग्रसेन चौकात आले. त्यांचे आधार कार्ड चेक करून व DP वरील फोटो वरून ओळख पटवून हा मोबाईल त्यांना परत देण्यात आला. यावेळी वाहतूक पोलीस राजेश दुबे यांचा राठी यांनी पुष्पगुच्छ देऊन सत्कार करून आभार व्यक्त केले. राजेश दुबे यांच्या प्रामाणिकतेचे शहर वाहतूक पोलीस निरिक्षक गजानन शेळके, उपनिरीक्षक सुरेश वाघ व सर्व वाहतूक पोलीस अंमलदार यांनी कौतुक केले.